«Լաչինի ռենտգեն սարքերը պետք է վերահսկի ՌԴ-ն, ոչ թե Բաքուն, հակառակ դեպքում՝ առևանգման կետեր կդառնան». Դ. Բաբայան

«Եթե ռենտգեն սարքավորումներ դրվեն Լաչինի միջանցքում, դրանք բացառապես պետք է լինեն ռուս խաղաղապահ առաքելության վերահսկողության ներքո, չպետք է Ադրբեջանն այն վերահսկի»,-24TV-ի հաղորդման ժամանակ ասել է Արցախի նախագահի խորհրդական, հատուկ հանձնարարությունների գծով ներկայացուցիչ Դավիթ Բաբայանը՝ անդրադառնալով այն տեղեկություններին, որ քննարկվում է Լաչինի միջանցքում տեսահսկող՝ սարքեր դնելու հարցը, որը պետք է վերահսկի դեպի Արցախ գնացող և եկող բեռնատար մեքենաները:

«Ռուսաստանի արտգործնախարար Սերգեյ Լավրովը Բաքվում էլ ասել է, որ Բերձորի միջանցքում այլ սուբյեկտ չի կարող լինել, քանի որ նոյեմբերի 9-ի հայտարարությամբ միջանցքը գտնվում է ռուս խաղաղապահների պատասխանատվության ներքո և չի ազդելու մարդկանց տեղաշարժի վրա: Անհնարին է, որ այդ տարածքում ադրբեջանական հսկիչ կետեր տեղակայվեն, դրանք չեն լինելու հսկիչ կետեր, այլ՝ առևանգման կետեր: ԽՍՀՄ-ի ժամանակ տեսել ենք, թե ինչ վայրագություններ են եղել, հիմա ո՞վ է զսպելու Բաքվին, 2020-ի պայմանագիրը պետք է անվերապահորեն կատարվի: Կարծում եմ, այդ սարքերը Արցախին վտանգ չեն ներկայացնի, հակառակը՝ կապահովեն խաղաղություն»,- նշել է Բաբայանը: