Զոհված զինծառայողների ծնողներին թույլ չտվեցին հասնել Լիսագոր

Զոհված զինծառայողի մայր Նաիրիա Մելքոնյանը քիչ առաջ տեղեկացրեց, որ Տեղ գյուղից դեպի Ստեփանակերտ ուղևորվելիս առաջինը հայկական անցակետն էր, որտեղից իրենց թույլ չեն տվել անցնել, սակայն իրենք կարողացել են ճեղքել ոստիկանների շղթան: «Դրանից հետո ադրբեջանական նոր պոստ է դրվել բլուրի վրա, որը հսկում է մեր ճանապարհը»,- ասաց զոհվածի մայրը՝ նշելով, որ իրենք այժմ վերադարձել են Տեղ գյուղ. «Թույլ չտվեցին, որ մենք գնանք Լիսագոր»:

Հիշեցնենք, որ դեռևս մարտի 31-ին զոհվածների ծնողները հավաքվել էին «Եռաբլուր» զինվորական պանթեոնում և մտադիր էին այնտեղից երթ իրականացնել դեպի Սյունիք: Նրանք նշել էին, որ ուզում են տեղում պարզել, թե ինչպես է Հայաստանի Հանրապետության ինքնիշխան տարածք ներխուժել ադրբեջանական զինուժը և ինչո՞ւ է Բերձորի միջանցքը մինչև հիմա փակ: