«Մեզ անհրաժեշտ է վերափոխել ու վերանայել շատ բան». Հակոբ Բադալյան

Քաղաքական մեկնաբան Հակոբ Բադալյանը ֆեյսբուքյան իր էջում գրում է. «Հայաստանի հանրապետությունը ԽՍՀՄ փլուզումից հետ անցել է շատ բարդ ճանապարհ: Այդ ճանապարհը լի է եղել սխալներով, վրիպումներով, հանցավորություններով, հակասություններով, չիմացություններով, տգիտություններով, բայց միաժամանակ նաեւ շատ բարդ ու ծանր խնդիրներին տրված տքնաջան լուծումներով:
Այդ ամենը, թե՛ պատմագիտական, թե՛ քաղաքագիտական, թե՛ հետազոտական այլ ուսումնասիրությունների ահռելի նյութ է ներկայի ու ապագայի համար: Այդ ամենը անմիջական դիտարկումների նյութ է այսօր տեղի ունեցողի պատճառահետեւանքային կապերը վեր հանելու, ախտորոշելու համար:
Բայց, այդ ծանր ու բարդ ճանապարհը երբեմն այնպիսի թեթեւությամբ են «զրոյացնում», որ ցավալի է առնվազն այն՝ թե ողջ, թե մահացած անձանց հանդեպ, որոնք այդ ամբողջ ընթացքում՝ տարբեր տարիների ու շրջափուլերի զբաղված են եղել ծանրագույն խնդիրներ լուծելով: Եվ, եթե մի տեսանկյունից նայելով կարող ենք ասել, որ հանրագումարը միեւնույն է՝ վատն է եղել, թեկուզ այլ մարդկանց պատճառով, ապա մյուս տեսանկյունից նայելով էլ կարող ենք ասել, որ գուցե մեզ համար շատ ավելի վաղ ու շատ ավելի ծանր հետեւանքներ լինեին, եթե անցյալ երեք տասնամյակում չլինեին այդ ծանր խնդիրների գոնե նվազագույն լուծումները:
Մեզ անհրաժեշտ է կառուցել որակապես նորը, վերափոխել ու վերանայել շատ բան: Սա աներկբա է: Եվ, եթե մենք իրապես ունենք դա անելու ներուժ, ունենք դա անելու մասնագիտական խորություն, ունակություն, ապա անցած ճանապարհը՝ ենթարկելով քննադատական հայացքի, արդարացիորեն խիստ քննադատական հայացքի, ձեռնպահ կմնանք այդ ճանապարհն անարդարացի թեթեւությամբ լուծարելու մոտեցումներից:
Առավել եւս, որ «ջնջենք սկսենք նորից»-ը տեսականում հնչում է ուժեղ ու գրավիչ, բայց գործնականում իրականանալի է միայն գրատախտակի, այլ ոչ գետնի վրա:
Նորը սովորաբար կառուցվում է զգալիորեն լուռ, ու արդեն որպես կառույց է դառնում խոսուն»: