«Անդամահատված մատներով տասնյակ երեխաներ են դիմում հիվանդանոցներ». Արսեն Թորոսյան

ԱԺ-ն քննարկում է «Լիցենզավորման մասին օրենքում փոփոխություններ և լրացումներ կատարելու» նախագծերի փաթեթը: Հիմնական զեկուցող, ԱԺ գիտության, կրթության, մշակույթի, սփյուռքի, երիտասարդության և սպորտի հարցերի մշտական հանձնաժողովի նախագահ, օրենսդրական նախաձեռնության հեղինակ Սիսակ Գաբրիելյանը նշել է, որ առաջինից երկրորդ ընթերցում ընկած ժամանակահատվածում կատարվել են մի շարք փոփոխություններ: Մասնավորապես, կարգելվի հրավառությունների ներմուծումը, բացառությամբ՝ պետական կամ համայնքային նշանակության տոների կամ պետական կամ համայնքային մասնակցության միջոցառումների ընթացքում: Նախատեսվում են նաև տուգանքներ՝ ներմուծման հետ կապված պահանջները խախտելու դեպքերում: Կարգելվի 16 տարին չլրացած անձանց բոլոր դասերի հրագործական արտադրատեսակի վաճառքը:

«Երբ քնած երեխաներին, հիվանդ տարեցներին ահաբեկում ենք մեր ծննդյան, հարսանեկան, կնունքի արարողությունների ժամանակ՝ րոպեական հաճույք ստանալու համար, չենք հարգում այդ մարդկանց հանգիստ ապրելու իրավունքը: Փաստացի այսօր փորձում ենք այդ հարցը կարգավորել»,- իր ելույթում ասաց ՔՊ-ական պատգամավոր Արսեն Թորոսյանը: «Սրանով լուծելու ենք նաև մանկահասակ երեխաների խեղումները կանխարգելելու հարցը: Հատկապես ամանորյա տոներին տասնյակներ են անդամահատված մատերով, աչքով երեխաների ընդունելությունները մանկական հիվանդանոցներ: Կոչ եմ անում ծնողներին, անկախ օրենքից, արգելել երեխաներին հրավտանգ նյութերի հետ առնչվելուց: Երրորդ, կանխարգելելու ենք տեխնածին աղետները»,- հավելեց Թորոսյանը: