Սաուդյան Արաբիայում կկայանա Ուկրաինայի հարցով գագաթնաժողով՝ առանց Ռուսաստանի

Ուկրաինան պատրաստվում է խաղաղության գագաթնաժողով անցկացնել Սաուդյան Արաբիայում, որը նախատեսվում է անցկացնել օգոստոսի սկզբին։ Այս մասին հայտարարել է Ուկրաինայի նախագահի աշխատակազմի ղեկավար Անդրեյ Երմակը։

«Մենք նախապատրաստում ենք Ուկրաինայի նախագահ Վլադիմիր Զելենսկու խաղաղության բանաձևի իրականացման հարցերով պետությունների ղեկավարների խորհրդականների հաջորդ հանդիպումը, որը շուտով կանցկացվի Սաուդյան Արաբիայում»,- ասել է Երմակը։
Նրա խոսքով, խաղաղության պայմանագրի հիմքում պետք է դրվի Ուկրաինայի կողմից մշակված Խաղաղության բանաձևի տասը հիմնարար կետեր։ Դրանք քննարկվում են աշխարհի ավելի քան 50 պետությունների ներկայացուցիչների հետ, որոնց հետ բանակցություններն արդեն ընթանում են «գրեթե ամենօրյա ռեժիմով»։ Թե որ պետությունների մասին է խոսքը, Երմակը չի հստակեցրել։

Ուկրաինայի նախագահի աշխատակազմի ղեկավարը նկարագրել է նաև խաղաղության պայմանագրի նախապատրաստման եռաստիճան փուլը։ Առաջինում նախատեսված են հանդիպումներ դիվանագետների և երկրների հավատարմագրված ներկայացուցիչների հետ, երկրորդում՝ ազգային անվտանգության հարցերով խորհրդականների, երրորդում՝ հիմնադիր գլոբալ գագաթնաժողովը պետությունների ղեկավարների մակարդակով, որը կարող է տեղի ունենալ մինչև տարվա ավարտը։

Նախօրեին WSJ-ն, վկայակոչելով դիվանագետներին, հայտնել էր, որ Սաուդյան Արաբիան մտադիր է օգոստոսի 5-6-ը խաղաղ բանակցություններ վարել իր տարածքում արևմտյան երկրների, Ուկրաինայի և առանցքային զարգացող երկրների միջև։ Նրանց խոսքով՝ թագավորությունում կայանալիք հանդիպմանը ակնկալվում է 30 երկրների ու կազմակերպությունների ներկայացուցիչներ։ Ռուսաստանի Դաշնության ներկայացուցիչները ներկա չեն լինի հանդիպմանը, նշում է WSJ-ը։