Կարմիր խաչի գրասենյակը շրջափակած քաղաքացիները ժամանակ տվեցին մինչև երկուշաբթի

Կարմիր խաչի միջազգային կոմիտեի հայաստանյան գրասենյակի մոտ բողոքի ակցիա իրականացնող քաղաքացիները դադարեցնում են այն՝ մինչև երկուշաբթի օրը ժամանակ տալով։

Հիշեցնենք՝ քաղաքացիները փակել էին կոմիտեի մուտքը և պահանջում էին անհապաղ քայլեր ձեռնարկել օգոստոսի 14-ի ողբերգական վթարի հետևանքով մահացած Հելեն Դադայանի դին Արցախ տեղափոխելու համար։

«Հույսեր կան, կարող ենք հասնել տեղափոխմանը։ Դրական պատասխանի դեպքում մեր շնորհակալությունը կհայտնենք Կարմիր խաչին, իսկ եթե մեզ խաբեն, նորից կշարունակենք մեր պահանջը։ Ընտանիքին անընդհատ խաբում են, ասում են՝ հեսա կտանենք, բայց չեն տանում, սա անընդունելի է»,- նշել է ակցիայի մասնակիցը։

Ավելի վաղ հայտնել էինք, որ Բաքուն թույլ չի տալիս Հելենի մարմինը տեղափոխել Արցախ։

Նշենք, որ Հելեն Դադայանն Մարտունիի Ճարտար քաղաքից էր։ Արցախի լիակատար շրջափակման հետևանքով նա 9 ամիս կտրված էր Արցախից։