«Արցախի շուրջ իրավիճակն այնքան էլ պարզ չէ, որքան թվում է». Ռ. Ղևոնդյան

Քաղաքագետ Ռոբերտ Ղևոնդյանը ֆեյսբուքյան իր էջում գրել է. «Արցախի շուրջ իրավիճակն այնքան էլ պարզ չէ, որքան թվում է։ Ինչքան էլ որոշ տեղերից սնվող եւ կառավարվող «մասնագետները» աղաղակում են, թե «ամեն ինչ կորած է», իրականում իրավիճակն այնքան անորոշ է, որ հնարավոր է տառացիորեն ամեն ինչ։
Արտաքին քաղաքական դաշտում միջազգային հանրության մոտեցումը միանշանակ չէ։ Ֆրանսիան այլ կերպ է տեսնում լուծումները, Ռուսաստանը այլ, Չինաստանը մի դիրքորոշում ունի, ԱՄՆ-ն մեկ այլ։ Բոլորն ունեն իրենց շահերը եւ պատկերացումները։ Ում մոտեցումը ինչպես կարելի է օգտագործել - այ սա է ամենակարեւոր հարցը:
Ներքին քաղաքական դաշտում որոշ խմբեր փորձում են Արցախի շահերի հաշվին սեփական շահերն իրացնել՝ օգտվելով արտաքին դերակատարների տված հնարավորություններից։ Արցախի ընտրված նախագահի հեռացումը մտնում է այդ խմբերի պլանների մեջ։ Իսկ այլ դերակատարներ, ինչպես օրինակ Սամվել Բաբայանը, փորձում են նախագահի դիրքերն ամրապնդելու միջոցով իրավիճակի վրա ազդելու շանս ստանալ։ Բնականաբար այն առաջին խմբերը պայքարում են նման մարդկանց դեմ՝ իրենց դիրքերն ամրացնելու համար։
Ինչ վերաբերվում է Հայաստանին, ապա մենք այս պահին հնարավոր ամենաճկուն դիրքավորումն ենք ընտրել։ Հայաստանը Արցախի կողքին է, բայց թե ինչ անել, որոշումները կայացվում է Ստեփանակերտում, եւ պատասխանատվություն կրում է Ստեփանակերտը։
Բոլոր խաղաքարտերը հնարավոր չէ բացել։ Պետք է միայն հուսալ, հավատալ, աշխատել եւ չշտապել։ Ոչինչ կորած չէ, թեեւ ոչինչ էլ դեռ ձեռք չի բերվել»։