Երկուշաբթի, 17 օգոստոսի, 2026 թ.
|
Ստեփանակերտում`   +19 °C

Հայաստանը կոնյակի արտահանման հետ կապված խնդիրները չի կապում քաղաքական գործընթացների հետ․ #РБК

Հայաստանը կոնյակի արտահանման հետ կապված խնդիրները չի կապում քաղաքական գործընթացների հետ․ #РБК
4566
Ուրբաթ, 06 հոկտեմբերի, 2023 թ., 17:30

Հայաստանը կոնյակի արտահանման հետ կապված խնդիրները չի կապում քաղաքական գործընթացների հետ, գրում է РБК-ն։

«Չէի ասի, թե դա ունի քաղաքական ենթատեքստ։ Ինձ Հռոմի ստատուտի հետ կապված հարցեր մի տվեք։ Ես դրա մասնագետը չեմ»,- ասել է ՀՀ էկոնոմիկայի նախարար Վահան Քերոբյանը։

«Երեկ մի քանի տասնյակ ավտոմեքենաներ՝ բեռնված ալկոհոլային արտադրանքով, մեկնել են։ Կարևոր է, որ Հայաստանում արտադրված ալկոհոլային արտադրանքը լինի բարձր որակի, և որոշ ժամանակ առաջ մենք արդեն սկսել ենք համապատասխան գործընթաց, որպեսզի Հայաստանից արտահանվող ալկոհոլը լինի բարձր որակի։ Այժմ սպասում ենք լաբորատոր անալիզի պատասխաններին։

Պատճառների մասին ռուսական կողմին տեղեկացվել է։ Իրականացնում են կոնյակի որակի ստուգումներ։ Մենք կապի մեջ ենք ռուս գործընկերների հետ»,- նշել է Քերոբյանը։

Հոկտեմբերի 3-ին Քերոբյանը հայտնել է, որ Հայաստանից Ռուսաստան փոխադրող ավտոփոխադրողները խնդիրներ են ունեցել ռուսական կողմից հայկական կոնյակի որակի ստուգման պատճառով և հայկական բեռնատարներն սկսել են պարապուրդի մատնվել Վերին Լարսի անցակետում:

Ռուսաստանում Հայաստանի դեսպանության առևտրային կցորդ Վահան Հակոբյանը հայտնել է, որ Ռուսաստանի հետ սահմանին մոտ 60 մեծ բեռնատար է կուտակվել, որոնք սպասում են որակի փորձաքննության ավարտին:

Մոսկվայի և Երևանի հարաբերությունները սրվել են Լեռնային Ղարաբաղում ռուսական խաղաղապահ զորակազմի հասցեին հայկական իշխանությունների հայտարարությունների, ՀԱՊԿ դիրքորոշման և Հայաստանի կողմից Հաագայի դատարանի կանոնադրության վավերացման կապակցությամբ, որը մարտին նախագահ Վլադիմիր Պուտինի և Ռուսաստանի մանկական օմբուդսմեն Մարիա Լվովա-Բելովայի ձերբակալման օրդեր էր տվել: Կրեմլը և Ռուսաստանի ԱԳՆ-ն այդ որոշումն անվանել են առոչինչ և նշել, որ ՄՔԴ իրավասությունը Մոսկվան չի ճանաչում: Հայաստանի իշխանությունները պարզաբանել են, որ փաստաթուղթը վավերացրել են Ադրբեջանից պաշտպանվելու համար։