«Ադրբեջանցին սպառնում է ինձ գտնել ու ***ել իմ ականջը». Տաթևիկ Հայրապետյան

ԱԺ նախկին պատգամավոր, ադրբեջանագետ Տաթևիկ Հայրապետյանը գրել է. «Արդեն տևական ժամանակ է, ինչ ադրբեջանցի տարբեր օգտատերեր կեղծ, նաև իրական օգտահաշիվներից հնչեցնում են անձնական բնույթի սպառնալիքներ իմ հասցեին: Նրանք հատկապես թիրախավորում են ինձ արտերկրում ծավալած գործունեության համար, որի շրջանակներում հստակ փաստերով ցույց եմ տալիս, որ Ադրբեջանն ագրեսիվ, հայատյաց բռնապետական երկիր է, որտեղ քնած հային կացնահարողը հերոսացվում է նախագահի կողմից:
Օրինակ, վերջին նամակներից մեկում ոմն կեղծ օգտատեր սպառնում է, որ երբ ես նորից այլ երկրում լինեմ «ինքը կգտի ինձ ու կկտրի իմ ականջը»: Իմ դեմ այս արշավը նպատակ ունի անապահովության ու վտանգի զգացողություն սերմանել, որից դրդված ես չպետք է գործունեություն ծավալեմ արտաքին լսարանի հետ, բայց իրենք չարաչար սխալվում են այդ հարցում: Ես սա համարում եմ իմ գործունեության արդյունավետության ցուցիչ, ավելին ասեմ՝ ես այս ամենը ես ուղղելու եմ իրենց դեմ:
Բացի այդ, իմ էջում շարունակ մեկնաբանություններ ու վիրավորանքներ են գրում, որոնցից ոչ բոլորն եմ հասցնում ջնջել, դրա համար հայցում եմ իմ էջի հետևորդների ներողամտությունը: Մի բան պարզ է՝ նրանք հստակ նպատակ են դրել հոգեբանական ահաբեկչության ենթարկել հայ հանրությանը, դա թույլ տալ չի կարելի»: