ԱՄՆ-ն և ԵՄ-ն կոչ են արել Ադրբեջանին` ապահովել Արցախ վերադառնալ ցանկացողների անվտանգությունը

ԱՄՆ-ն և Եվրոմիությունը կոչ են արել Ադրբեջանին՝ ապահովել Լեռնային Ղարաբաղի այն բնակիչների իրավունքներն ու անվտանգությունը, որոնք կցանկանան վերադառնալ տարածաշրջան: Այս մասին ասվում է Վաշինգթոնում կայացած ԱՄՆ-ԵՄ գագաթնաժողովից հետո արված հայտարարության մեջ։ Նշվում է, որ ԱՄՆ-ն և Եվրոմիությունը հավատարիմ են Հայաստանի և Ադրբեջանի միջև կայուն խաղաղության խթանմանը, որը հիմնված է ինքնիշխանության, սահմանների անխախտելիության և տարածքային ամբողջականության փոխադարձ ճանաչման վրա: «Կոչ ենք անում Ադրբեջանին՝ ապահովել այն մարդկանց իրավունքներն ու անվտանգությունը, ովքեր մնում են Լեռնային Ղարաբաղում, ինչպես նաև նրանց, ովքեր ցանկանում են վերադառնալ իրենց տները։ Նաև կոչ ենք անում բոլոր կողմերին հավատարիմ մնալ ուժի չկիրառման և դրա սպառնալիքի բացառման սկզբունքին»,- ասված է հայտարարության մեջ: