«Ցավում եմ, որ ՀՀ ընդդիմադիր դաշտում չեն կարողանում գալ կոնսենսուսի»․ Արշակ Աբրահամյան

Արցախցի վերլուծաբան, հասարակական-քաղաքական գործիչ Արշակ Աբրահամյանը ֆեյսբուքյան իր էջում տեսանյութ է տարածել՝ գրելով հետևյալը․ «Ռեգիոնալ պայքարը մտնում է կուլմինացիոն փուլ, իսկ Հայաստանը իր մեղմ ասած ոչ կոմպետենտ ղեկավարությունով հանդերձ քաղաքական արենայում դիրքավորվում է ոչ ի շահ Մայր Հայաստանի՝ երկիրը տանելով նոր արկածախնդրության ճանապարհով։
Եվ դժվար չի կռահել ու վերլուծելով իրավիճակը, հասկանալ իրադարձությունների տրամաբանական հաջորդականությունը, թե նման տեմպերով շարունակվելու պարագայում ինչեր են սպասվում Հայոց Պետականությանը։
Այս պահի դրությամբ Արցախը կործանված է, թշնամին տարածքներ է պահանջում արդեն ՀՀ սուվերեն տարածքից, Հակարիի կամրջի վրա տեղադրված անցակետի պատճառով հնարավոր չեղավ գոնե ԱՀ ՊԲ-ի զինտեխնիկան բերել Հայաստան և որոշակի քանակով համալրել այստեղի զորամասերը, ունեցանք ահռելի մարդկային կորուստներ (այդ թվում պրոֆեսիոնալ հրամանատարական կազմից), Արցախ-Հայաստան էներգետիկ և պարենային կապը այլևս չկա, որի հետևանքները մոտ ապագայում կսկսեն զգացնել տալ….
Այս ցուցակը այնքան երկար է, որ երևի սահմանափակվեմ այսքանով։
Եվ ես խորապես ցավում եմ, որ ՀՀ ընդդիմադիր դաշտում չեն կարողանում գալ կոնսենսուսի, թե ով պետք է վերջապես երկիրը ղեկավարի այս «իշխանությանը» վռնդելուց հետո»։