«Եթե դու պարտվել ես պատերազմի դաշտում, այդ նույն անձը դիվանագիտական սեղանի շուրջ չի կարողանալու խոսել». Ռուբեն Մելքոնյան

ԵՊՀ արևելագիտության ֆակուլտետի դեկան, թուրքագետ Ռուբեն Մելքոնյանը 24TV-ի եթերում խոսել է Ադրբեջանի նոր պահանջների, ռազմատենչ քաղաքականության պատճառների և սողացող պատերազմի վտանգի մասին. «Ադրբեջանա-թուրքական դրված խնդիրը շարունակականության տրամաբանության մեջ է. հիմնական խնդիրը՝ Արցախի օկուպացիան, կարող ենք ասել կատարված է, բայց այստեղ ի հայտ է եկել նոր իրողություն․ Ադրբեջանը քաղաքական, ռազմական, ստրատեգիական լիովին այլ դիրքեր է զբաղեցրել և դա նրան լուրջ հնարավորություն է տալիս հետագա քայլեր անելու համար՝ օկուպացիոն տրամաբանության, էսկալացիա հրահրելու շրջանակներում։ Այս առումով դա ոչ թե սողացող պատերազմ է, այլ շատ կանխատեսելի թշնամական քաղաքականության շարունակություն, որովհետև թշնամին զբաղեցնում է բարձունքներ, որտեղից դիտարկվում է քո երկրի տարատեսակ ճանապարհներ, թշնամին զբաղեցնում է քաղաքական բարձունքներ, որոնցով քո երկրի շահերը կարող է թիրախավորել և ռմբակոծել. թշնամին զբաղեցնում է նաև գաղափարախոսական բարձունքներ, որոնցից անընդհատ հարձակումներ է գործում քո պետական շահերի վրա։ Կարող ենք ասել, որ նոյեմբերի 9-ը սկիզբն էր մի մեծ պրոցեսի, որը նշանակում է այլ Հայաստան, որտեղ այլ արժեքներ են գերակայելու»։ Հարցին, թե ինչո՞ւ Հայաստանը «Խաղաղության պայմանագրում» միայն 3 կետ է նշում և գերեվարված անձանց Հայաստան վերադաձնելու պահանջ չի ներկայացնում Ադրբեջանին, Մելքոնյանը նշել է, որ դա պայմանավորված է պարտվողի հոգեբանությամբ․ «Եթե դու պարտվել ես պատերազմի դաշտում, այդ նույն անձը դիվանագիտական սեղանի շուրջ չի կարողանալու խոսել։ Պարտվող կողմի բանակցողը չի էլ կարող, լծակներ չունի այդ ամենը բերել փաստաթղթի մեջ»: