Սամվել Շահրամանյանը կհրավիրվի 44-օրյա պատերազմի հանգամանքներն ուսումնասիրող հանձնաժողով

«Ազատության» հետ զրույցում հանձնաժողովի նախագահ Անդրանիկ Քոչարյանը պարզաբանել է՝ իրենք ծրագրել էին հանձնաժողով հրավիրել Արցախի նախկին նախագահ Արայիկ Հարությունյանին, նաև պատերազմի օրերին Արցախի պաշտպանության բանակի հրամանատար Ջալալ Հարությունյանին, սակայն երկու դեպքում էլ կան խոչընդոտներ. Արցախի նախկին նախագահը Բաքվի բանտում է, իսկ Պաշտպանության բանակի նախկին հրամանատարը քրեական գործով է անցնում, հետևապես, հանձնաժողովը քննարկել և որոշել է մի շարք հարցերի պատասխաններ փորձել ստանալ Լեռնային Ղարաբաղի վերջին նախագահից:

«Բավականին շատ հարցեր կան, որոնց պատասխանները նախագահի պաշտոնում արդեն հայտնված պարոն Շահրամանյանից կկարողանանք ստանալ: Ենթադրում եմ, որ ինքը ինչ-որ բաների հասցրած կլիներ ծանոթացած լինել, նաև՝ 44-օրյա պատերազմի դրվագներին առնչվող: Առավել ևս, որ պարոն Շահրամանյանը նաև 2018-ից 2020 թվականներին եղել է Արցախի Հանրապետության ազգային անվտանգության ծառայության տնօրենը։ Դա ի՞նչ է նշանակում, որ մեր այն հատվածը՝ կապված պետական դավաճանության, դիվերսանտների և նրանց գոյության մասին, նաև պատերազմի մինչև սկսվելը տեղեկատվության հետ կապված հարցերի պատասխանները մենք, բնականաբար, կուզեինք լսել պարոն Շահրամանյանից», - ասել է նա:

Սամվել Շահրամանյանը՝ որպես Արցախի ազգային անվտանգության ծառայության տնօրեն, պաշտոնավարել է 2018 թվականից մինչև 2020 թվականի մայիսը: Դրանից հետո նշանակվել է ռազմահայրենասիրության, երիտասարդության, սպորտի և զբոսաշրջության նախարար։ Իսկ պատերազմից մեկ տարի անց արդեն զբաղեցրել է Անվտանգության խորհրդի քարտուղարի տեղակալի, ապա նաև քարտուղարի պաշտոնը:

Թե այս պարագայում 44-օրյա պատերազմին առնչվող ինչ տեղեկություններ կարող է Շահրամանյանը հայտնել քննիչ հանձնաժողովին, պարզ չէ: Հանձնաժողովի նախագահ Անդրանիկ Քոչարյանը երեկվանից փորձում է կապ հաստատել նրա հետ, բայց ասաց՝ Շահրամանյանը իր զանգերին չի պատասխանում: