««Միջանցք» բառն օգտագործողները թաքնված մտքեր ունեն»․ Իրանի դեսպան

ՀՀ-ում Իրանի դեսպան Մեհդի Սոբհանին «ՍիվիլՆեթ»-ի եթերում խոսելով Հայաստանով անցնող ճանապարհների դեպքում «միջանցք» տերմինն օգտագործողների մասին՝ ասել է, որ նրանց հայտարարությունների հետևում թաքնված մտքեր կան․ «Մենք Հայաստանի անկախության, տարածքային ամբողջականության և ինքնիշխանության կողմնակից ենք ու դեմ ենք ցանկացած բանի, որը կխախտի միջազգային սահմանները: Միջանցքի մասին պիտի նշեմ, որ միջազգային գրականության մեջ այն նշանակում է հաղորդակցության ուղի, բայց երբ քննարկվում է Հայաստանի կոնտեքստում, հատուկ իրավական իմաստ է ստանում։ Նրանք, ովքեր կրկնում են այդ բառը, հատուկ իմաստով են այն օգտագործում և իրենց հայտարարություններում թաքնված մտքեր ունեն․․․ Մենք հաղորդակցության ուղիներին դեմ չենք, սակայն դեմ ենք այն հաղորդակցություններին և ուղիներին, որոնք դուրս են Հայաստանի ինքնիշխանությունից և հարցականի տակ են դնում Հայաստանի անկախությունը»,- ասել է Մեհդի Սոբհանին։