«Ամբիոններ կան, որ աթոռը պահելու համար ասում է՝ խաղաղությանը 5 է պակաս». Աննա Մկրտչյան

ԱԺ «Պատիվ ունեմ» խմբակցության պատգամավոր Աննա Մկրտչյանը «Երկիր մեդիա»-ի եթերում ադրադառնալով ԱԺ վերջին նիստում արցախցիների օգնության համար 2023-ի բյուջեից վերաբաշխում կատարելու հարցին՝ ասել է․ «Ես չեմ պատրաստվում էս իշխանազավթներին շնորհակալություն հայտնել, որ որոշել են արցախահայերին 10 000-20 000 դրամ օգնություն տալ, էն դեպքում, երբ իրենց քաղաքականության պատճառով են մարդիկ հայրենազրկվել։ Այդ մարդիկ ՀՀ-ում չունեն ապահովության նվազագույն երաշխիքներ, միայն հայ հասարակության բարի կամքի շնորհիվ է, որ նրանք ինտեգրվում են։ ՀՀ քաղաքացու անձնագիր կրող հային ասել, որ դու ՀՀ քաղաքացի չես, մենք քո համար փախստականի կարգավիճակ ենք նախատեսում, դա նորմալ իրավիճակ չէ»։ Դիտարկմանը՝ Փաշինյանը մի կողմից խոսում է, որ Ադրբեջանը պատրաստվում է պատերազմի, մյուս կողմից՝ որ խաղաղության սկզբունքները համաձայնեցված են, Մկրտչյանը նշել է․ «Նայած՝ ո՞ր ամբիոնից: Ամբիոններ կան, որ աթոռի պահպանության համար պետք է ասել՝ խաղաղությանը 5 է պակաս։ Կան ամբիոններ, որտեղ պետք է ասել՝ դե, ինձ եկեք, պաշտպանեք... Իշխանության մնալու սխեման պարզ է, ինքը հասկացել է, որ մարդիկ իրեն այլևս չեն հավատում»։