«Ես չգիտեի, որ Սաքունցն իմ արվեստի մեծ ֆանատն է». Հայկ Մամիջանյան

ԱԺ «Պատիվ ունեմ» խմբակցության ղեկավար Հայկ Մամիջանյանն այսօր վաղ առավոտից հարցաքննվում էր ՔԿ-ում: Դուրս գալով շենքից՝ լրագրողների հետ զրույցում ասել է. «Իմ տեղեկություններով, հաղորդումը ներկայացվել է Վանաձորի Հելսինկյան գրասենյակի կողմից, որի ղեկավարն Արթուր Սաքունցն է։ Ես չգիտեի, որ ինքն իմ արվեստի մեծ ֆանատն է: Թող շարունակի լսել իմ ելույթները, բալքի մի օգուտ տա... Սա պարզագույն քրեական հետապնդում է՝ պայմանավորված իմ քաղաքական գործունեությամբ»: Լրագրողների հարցին՝ կմանրամասնե՞ք՝ ձեզ ինչի համար էին կանչել, նշեց. «Խոսքը վերաբերում է սեպտեմբերի 12-ին ԱԺ-ում իմ ճեպազրույցին, որում ասվում էր, որ եթե (իսկ իրականում երբ) Փաշինյանը հերթական անգամ անհամաչափ ուժ կիրառի խաղաղ ցուցարարի՝ հայրենասերի նկատմամբ, դրանից հայրենասերները չեն ընկրկելու, չեն վախենալու։ Այսինքն՝ եթե հերթական անգամ Փաշինյանը որոշի արյուն թափել, ապա դրանից վախեցող չկա»: