««Միջանցքի» հարցն Ալիևի հարցը չէ, նա գործիք է». Հակոբ Բադալյան

Քաղաքական մեկնաբան Հակոբ Բադալյանի ֆեյսբուքյան գրառումը. «Ասում են՝ Ադրբեջանը վախենում է ամերիկյան պատժամիջոցներից և դրա համար չի հարձակվում «միջանցք» գրավելու: Ընդ որում, սա ասում են անձինք կամ խմբեր, որոնք մի քանի ամիս կամ շաբաթ առաջ էլ ասում էին, թե ինչ-ինչ, բայց Արցախում էթնիկ զտում ԱՄՆ-ն Ադրբեջանին թույլ չի տա, դա «կարմիր գիծ է» ԱՄՆ-ի համար:
Հիմա այդ ասող գործիչների մի զգալի մասը հավաստիացնում է, որ «ամերիկյան պատժամիջոցից վախենալով» Ադրբեջանը չի գնում «միջանցք» գրավելու:
Իհարկե, անհեթեթ կլինի ասել, թե Ալիևը թքած ունի պատժամիջոցների վրա, թեև ինքնին շատ բան կախված է պատժամիջոցի աստիճանից, թե հատկապես ի՞նչ կարգի պատժամիջոցի մասին է խոսքը:
Բայց, ընկերներ, «միջանցքի» հարցն Ալիևի հարցը չէ, դա նրա տրամաչափի հարց չէ, նա այդ հարցում առավելագույնը կարող է լինել «գործիք»: Այդ հարցը աշխարհաքաղաքական առանցքային, հիմնարար հարցերից մեկն է, որտեղ բախվում են մի շարք ուժային կենտրոնների ռազմավարություններ:
Հիմա, եթե կայացվեց այդ գործիքն օգտագործելու որոշում՝ որեևէ կոնֆիգուրացիայով, ապա Ալիևին կտրվեն նաև որոշակի «երաշխիքներ»: Հետո նրան այդ երաշխիք տվողները կգցեն, թե ոչ, սա այլ խնդիր է, բայց տակը կմնա նրա «ձեռքով» արվածը: Իսկ «գործիք» լինելուց նա հրաժարվել չի կարող այլևս, որովհետև ստացել է շատ բարձր ավանս:
Հետևաբար, արժե թերևս վերջ տալ հիմա էլ ասելուն, թե «միջանցքը» կամ Հայաստանի տարածքային ամբողջությունն է որևէ մեկի համար «կարմիր գիծ»: Դա կարմիր գիծ է միմիայն, բացառապես Հայաստանի համար, և ըստ այդմ՝ մենք պետք է այդ հարցում ի վիճակի լինենք անցկացնել խորքային ու լուրջ քննարկումներ՝ իրավիճակը հանգամանալից հասկանալու և ախտորոշելու համար, ու մշակել դրանից բխող անելիքներ»: