«Կողքից փետը վերցրած խփում են ՀՀ-ին, մենք էլ որ ասում ենք Հայք, մենք էլ մեր ձևով ենք խփում ՀՀ-ին». Փաշինյանին զայրացրեց «Հայք» եզրույթը

Բելգիայում բնակվող Գոռ Հակոբջանյանը կիրառեց «Հայք» անվանումը և Փաշինյանին հարց հղեց հակառակորդի կողմից վերջերս առավել հաճախ կիրառվող «Արևմտյան Ադրբեջան» կեղծ եզրույթին, որով նշում են Հայաստանի տարածքը: «Արդյո՞ք դուք սա, ինչպես նաև Հայքի տարածքում բուն հայկական տեղանվանումներն ադրբեջաներենով փոխարինելը համարում եք ազգային անվտանգության հարց»:

Սա դուր չեկավ Փաշինյանին: «Դուք ձեր խոսույթով նպաստում եք էն խոսույթին, որի դեմ փորձում եք դիրքավորվել: Ասենք օրինակ, նույն Արևմտյան Ադրբեջանի: Մենք ասում ենք, որ հայրենիքը պետությունն է, էսօրվա մեր պետության անունը Հայաստանի Հանրապետություն է: Դուք ասում եք՝ ես անունը դնում եմ Հայք: Այսինքն, ինչ որ առումով, ձեր ասածը ձեր բարձրացրած հարցի նույնականացման ընդհանուր եզրեր ունի: Ձեր ասածն էլ ա նշանակում, որ Հայաստանի Հանրապետությունը ճիշտ անունը չի, Արևմտյան Ադրբեջան ասողներն էլ են նույնը ասում, որ ՀՀ-ն ճիշտ անունը չի: Սա բան չի, էդ բառերը, օրհներգի մասին խոսելիս էի ասում, դրանք գործողություն ունեն, դրանք սենց բան չեն: Հայքով չի կարելի ջարդել մեր Հայաստանի Հանրապետությունը: Որովհետև եթե կողքից փետը վերցրած խփում են ՀՀ-ին, մենք էլ ասում ենք Հայք, մենք էլ մեր ձևով ենք խփում ՀՀ-ին: Պետք է դուրս գանք վիրտուալ հայրենիքի պատկերացումներից»: