«Մինչ օրս ուղղածս ո՞ր հարցն է պատշաճ ու հստակ պատասխան ստացել». Արթուր Չախոյան

Ակտիվիստ Արթուր Չախոյանը ֆեյսբուքյան իր էջում գրել է․ «Ինչպես լուրջ վերաբերվել հարցուպատասխանի ֆորմատին, երբ վարչապետն ԱԺ ամբիոնից հայտարարում է, որ իրեն հանձնեմ փաստեր ու փաստաթղթեր, և երբ դրանք ձեռքիս ԱԺ դարպասի մոտ կոչ եմ անում իրեն վերցնել դրանք, իր իսկ հրահանգով ոստիկանները հեռացնում են ինձ...
Իսկ մինչ օրս ուղղածս ո՞ր հարցն է պատշաճ ու հստակ պատասխան ստացել։
Վարչապետին հասցեագրված ո՞ր մի նամակիս են ուղիղ, կամ ժամանակին պատասխանել։
Քաղաքապետարանին ուղղված ո՞ր մի դիմումիս են հստակ պատասխանել։
Ոստիկանությանն ուղղված ո՞ր մի ահազանգիս են օրենքի տառին համապատասխան ինձ ծանուցել։
Ո՞ւմ ուղղեմ հարցերս, երբ փաստերն արձանագրելու համար ինձ մեղադրում են քաղաքական պատվեր կատարելու մեջ։
Ես հարցերս ուղղում եմ ամեն օր... Ամեն տեսահոլովակովս... Ամեն անգամ, երբ ինձ տարբեր միջոցներով փորձում են լռեցնել... Գործովս եմ հարցեր ուղղում, բոլորին եմ հարցերս ուղղում՝ անտարբեր հասարակությունից սկսած, կոնկրետ հասցեատերերով վերջացրած... »։