«Շահրամանյանը բանակցություններ չի վարում Ադրբեջանի ներկայացուցիչների հետ». Վ. Գրիգորյան

Սամվել Շահրամանյանն այս պահին բանակցություններ չի վարում Ադրբեջանի ներկայացուցիչների հետ, եթե բանակցություն լիներ՝ Արցախի նախագահի աշխատակազմը համապատասխան հայտարարությամբ հանդես կգար, թաքցնելու որևէ բան չկա, «Ազատության» հետ զրույցում նշել է Արցախի նախագահի խորհրդական Վլադիմիր Գրիգորյանը։

Նախօրեին Արցախի Անվտանգության խորհրդի նախկին քարտուղար Սամվել Բաբայանը պնդել էր, թե Սամվել Շահրամանյանը բանակցում է, ամեն օր զանգում է Բաքու, խոսում է։

Արցախի նախագահի խորհրդականը չի բացառել, որ տեխնիկական հարցերի շուրջ Շահրամանյանը կարող է շփումներ ունենալ ադրբեջանական կողմի հետ, մասնավորապես՝ Բաքվում գտնվող գերիների հարցով: «Եթե Արցախի նախկին նախագահները կապվում են կամ մեր մյուս քաղաքացիները, ովքեր այս պահին գերեվարված են, որոշակի կապի ստեղծում է տեղի ունենում... Ես չեմ կարող ասել, մենք դա կարո՞ղ ենք համարել շփում, թե՞՝ ոչ, կարող ենք ենթադրել, որ դա զուտ տեխնիկական հարցեր կարող են լինել»,- ասել է Գրիգորյանը: