«Ոստիկանների մեջ մարդ կոչված արժեքը չկա», «կոռեկտ արտահայտվեք». քննարկում՝ ԱԺ-ում

Ինչպես հայտնել էինք, ԱԺ «Հայաստան» խմբակցության պատգամավոր Արեգնազ Մանուկյանը նախաձեռնել է աշխատանքային քննարկում՝ «Թափառող կենդանիների խնդիրը Հայաստանում և լուծման տարբերակները» խորագրով:
Քննարկմանը հրավիրվել են պետական և տեղական ինքնակառավարման մարմինների ներկայացուցիչներ, պաշտոնատար անձինք, մասնագիտացված ՀԿ անդամներ, կենդանասերներ և առհասարակ խնդրով մտահոգ քաղաքացիներ:

Դիմելով ՆԳՆ Ոստիկանության պետի տեղակալ Կարեն Հակոբյանին՝ կենդանասեր Աննա Մանուկյանը հարցրեց. «Համակարգ ընդունված ոստիկաններն ունե՞ն համապատասխան գիտելիքներ, ըստ որի՝ պետք է կենդանիների հանդեպ լինել բարեխիղճ, չվնասել: Վերջերս Զովունիում կենդանիներին էի կերակրում, ոստիկանները մոտեցան, թե՝ պետք չի կերակրել, թող սոված մնան ու հետ դառնան, որ տարածքում ընդհանրապես շուն չլինի: Կամ՝ շուն ա, էլի, թող սատկի, ի՞նչ կա որ: Ոստիկանների մեջ մարդ կոչեցյալ արժեքներ չկան ձևավորված»: Ոստիկանության պաշտոնյան հորդորեց կոռեկտ արտահայտվել. «Եթե ձեր ասածը վերացական չէ, այլ իրական դեպք է, դիմեք, ծառայողական քննություն կանցկացվի»,- հավելեց նա: