«Այս տարի դիտարկվել է երեխաների հանդեպ բռնությունների մեծ ծավալ՝ սեռականից մինչև ֆիզիկական»․ իրավապաշտպան

«Երեխաների նկատմամբ բռնության տարածվածությունը մանկապարտեզներում. ո՞րն է իրավական գնահատականը» թեմայով «Մեդիա կենտրոն»-ում այսօր քննարկում էր կազմակերպվել։ Առիթը դարձել էր օրերս տարածված տեսանյութը, որտեղ երևում է, թե ինչպես է մանկապարտեզի աշխատակցուհին ծեծում երեխային։
Բանախոսներից իրավապաշտպան Զարուհի Հովհաննիսյանի կարծիքով՝ առաջինը ծնողները պետք է արձագանքեն երեխային հանդեպ կիրառված բռնությանը․ «Ի՞նչ է նշանակում՝ չենք բողոքում, կամ՝ դե մենք էլ ենք բռնություն կիրառում, մի մամա էլ դաստիարակն է։ Հասարակությունը պետք է փոխի իր պատկերացումները, պետք է լսել երեխային, հավատալ նրա խոսքին։ Եթե այս դրվագը համացանցում չհայտնվեր, բռնությունը շարունակվելու էր, ինչպես և շարունակվում է տարբեր տեղերում»,- ասաց իրավապաշտպանը՝ խնդրի լուծումը տեսնելով հասարակության իրավագիտակցության մակարդակի բաձրացման մեջ։ «Կանանց աջակցման կենտրոնն այս տարի դիտարկել է երեխաների հանդեպ բռնությունների կիրառման բավական մեծ ծավալ՝ սեռականից մինչև ֆիզիկական։ Մենք այնքան երկար ենք աշխատում, որպեսզի խնամակալության հանձնաժողովներն ադեկվատ որոշումներ կայացնեն և անմիջականորեն օգնեն երեխաներին։ Խնամակալության և հոգաբարձության մարմինների ոչ պրոֆեսիոնալ լինելու և ոչ պատշաճ աշխատանքի մասին տարիներով խոսում ենք, բայց դեռ չունենք շոշափելի փոփոխություն և արդյունք։ Դեռ կան այսպիսի կառույցներ, որտեղ կոռուպցիոն ռիսկերը բավական բարձր են և երեխաները կրկին մնում են անտեսված»,- ասաց իրավապաշտպանը։

Բանախոսներից ՀՀ մարդու իրավունքների պաշտպանի աշխատակազմի կոնվենցիոն մանդատների ապահովման վարչության պետ Ժաննա Հակոբյանն էլ կարծիք հայտնեց, որ երեխաների նկատմամբ բռնության տեսարանները չպետք է տարածել և որ մանկապարտեզներում պարտադիր պետք է տեսախցիկներ լինեն։