«Կարո՞ղ էր միլիարդատեր Դուրովը չիմանալ, որ իր առնչությամբ Ֆրանսիայում կա նախաքննություն»․ Հակոբ Բադալյան

Քաղաքական մեկնաբան Հակոբ Բադալյանի թելեգրամյան գրառումը․ «Թելեգրամի հիմնադիր Դուրովի ձերբակալումը հետաքրքիր է:

Ֆրանսիայի ոստիկանությունը նրան ձերբակալել է Փարիզի օդանավակայանում, ուր ժամանել է մասնավոր օդանավով: Ըստ հաղորդագրության, նրան հետախուզում են հայտարարել և ձերբակալման օրդեր տվել այն ժամանակ, երբ օդանավն արդեն պատրաստվելիս է եղել վայրէջքի:

Ոստիկանությունը հայտնում է, որ ձերբակալությունը եղել է իրականացված նախաքննության հիման վրա:

Սա ևս հետաքրքիր է:

Կարո՞ղ էր միլիարդատեր Դուրովը չիմանալ, որ իր առնչությամբ Ֆրանսիայում կա նախաքննություն, որ կա իր հանդեպ Ֆրանսիայի իրավապահների հետաքրքրություն: Բարդ է պատկերացնել, որ սոցցանցի սեփականատեր միլիարդատերը, որը մեծ հավանականությամբ սերտ գործակցություն կարող է ունենալ առնվազն ռուսական հատուկ ծառայությունների հետ, նրանցից չստանար զգուշացում, որ Ֆրանսիայում «հետաքրքրություն» կա իր հանդեպ:

Ավելին, Դուրովը մասնավոր օդանավով Փարիզ է մեկնում Ադրբեջանից, կամ՝ ընդամենը երկու-երեք օր առաջ Ադրբեջանում լինելուց հետո, որտեղ նա շփվել է Ալիևի հետ, որն այդ օրերին էլ ընդունում էր Պուտինին: Ասում են, որ Պուտին-Դուրով հանդիպում չի եղել, քանի որ Պուտինն է հրաժարվել հանդիպման գաղափարից:

Բայց, այն, որ Դուրովը այցի օրերին եղել է Բաքվում, թերևս նշանակում է, որ եղել է համենայն դեպս շատ բարձր մակարդակի կոմունիկացիա նրա և Կրեմլի միջև:

Ահա, այդ ամենից հետո, նաև հաշվի առնելով հրապարակային մակարդակում Ֆրանսիա-Ադրբեջան դիմակայությունը, նա «միամիտ-միամիտ» գնում և ընկնում է Ֆրանսիայի իրավապահների ձե՞ռքը:

Ներեցեք, բայց ես մի տեսակ չեմ հավատում այդպիսի «միամտություններին»:

Այդ դեպքում, ի՞նչ է կատարվել կամ կատարվում:

Իմ սուբյեկտիվ դիտարկման շրջանակում առայժմ երկու վարկած է: Կամ Դուրովին «հանձնում» են մեծ առևտրի շրջանակում, ընդ որում վստահ չեմ՝ Ֆրանսիայի՞ հետ մեծ առևտրի, թե՞ Ֆրանսիան այստեղ կոմունիկացիա է և ունի պարզապես սակարկության իր բաժինը:

Կամ Դուրովը «մեծ կոմունիկացիոն» հանգույց է, որի համար ֆրանսիական բանտը պարզապես «ամենաապահով» տեղն է այդ գործառույթն իրականացնելու համար, ու դրանով է նաև հատկանշական, որ նա ըստ էության Պուտինի այցի ընթացքում Բաքվում գտնված լինելուց հետո՝ մեկնում է Փարիզ»: