«Տեղի է ունեցել ոչ թե դատական քննություն, այլ՝ գործ կարել»․ Արամ Օրբելյան

Ընթանում է ՍԴ դատավոր Հրայր Թովմասյանի գործով դատական հերթական նիստը, որին պաշտպանական կողմից ներկա է փաստաբան Արամ Օրբելյանը։ «Դատական ակտերի վերլուծությունից պարզ է դառնում, որ փորձել են ստանալ Հրայր Թովմասյանի տունը խուզարկելու որոշումներ, բայց չեն ստացել։ Հետո այդ հանգամանքը թաքցնելով ինչ-ինչ եղանակներով ստացել են, որպեսզի նրա տանը գտնեն 8 միլիոնը գերազանցող իրեր։ Ակնհայտ երևում է՝ խոսքը գնում է ոչ թե նրա մասին, որ տեղի է ունեցել դատական քննություն, այլ տեղի է ունեցել գործ կարել։ Սույն քրեական գործի շրջանակներում նպատակ է եղել ոչ թե արդարության ինչ-որ գործընթաց իրականացնել, այլ հասնել թաքնված օրակարգի, այն է՝ հեռացնել Հրայր Թովմասյանին ՍԴ-ի նախագահի, հետո էլ՝ ՍԴ դատավորի պաշտոնից»,- նիստի ժամանակ ասել է փաստաբան Արամ Օրբելյանը։

Հիշեցնենք՝ 2019-ին Հրայր Թովմասյանի դեմ հարուցված գործն առնչվում է նրա՝ արդարադատության նախարար եղած ժամանակահատվածին։ Նա մեղադրվում է պաշտոնեական լիազորությունները չարաշահելու մեջ: