«Տոմսային նոր համակարգին այս ցուցանիշներով անցնելը վտանգավոր է»․ Տիգրան Ավինյան

Հունվարի 1-ից երևանյան հանրային տրանսպորտը և մետրոպոլիտենը կաշխատեն միասնական տոմսային համակարգով։ Քաղաքացիները վճարումը կանեն QR code-ով: Առայժմ հատուկ սարքերից օգտվողների քանակը չի գոհացնում քաղաքային իշխանությանը, այսօր գործակարգավարական խորհրդակցության ժամանակ քաղաքապետ Տիգրան Ավինյանը դժգոհեց վիճակագրական տվյալներից․ «Մետրոպոլիտենը փորձը ցույց է տալիս, որ որոշակի սահմանափակումներով այս տոմսային համակարգին անցնելու համար միջանկյալ սահմանափակումներ պետք է մտնեն նաև ավտոբուսում և տրոլեյբուսում, որովհետև 1% կամ դրանից ցածր թվերը մեզ չեն բավարարում։ Հունվարի 1-ից անցնում ենք նոր համակարգին, պետք է պատրաստ լինենք, սակայն այսօրվա թվերով անցումը նոր համակարգին վտանգավոր է։ Պետք է անել այնպես, որ սարքերից օգտվողների թիվը կտրուկ աճի»,-ասաց Ավինյանը։
Համաձայն ներկայացված տվյալների վերջին մեկ շաբաթում միասնական տոմսային համակարգից օգտվել են 1.888.314 ուղևորից 44 341–ը։ «Էլեկտրատրանսպորտ» ՓԲԸ–ի քաղաքային տրանսպորտից օգտվել է 100 509 ուղևոր, որոնցից 1721-ն է էլեկտրոնային տարբերակով վճարում կատարել։