«Հնարավո՞ր է ունենալ միջուկային զենք ու չհայտարարել դրա մասին»․ Հակոբ Բադալյան

Քաղաքական մեկնաբան Հակոբ Բադալյանի թելեգրամյան գրառումը․ «Իրանի նախագահը Նյու Յորքում լրագրողների հետ զրույցում ասում է, որ Թեհրանը չի ձգտում միջուկային ռումբ ստեղծելու և պատրաստ է վերականգնել միջուկային գործարքը: Փեզեշկիանը ասում է, որ դա կարող է լինել սակայն այն պարագայում, որ ԱՄՆ ու Եվրոպան կատարեն իրենց պարտավորությունները, այլ ոչ թե միայն Իրանից պահանջեն պարտավորությունների կատարում:

Ըստ իս, Թեհրանի այս դիրքորոշումն ունի առավելապես տակտիկական իմաստ: Կարծում եմ, Իրանն արդեն ունի միջուկային զենք, պարզապես հայտնում է դրա մասին չհայտարարելու պատրաստակամություն: Սա կարող է թվալ տարօրինակ՝ ունենալ զենք ու չհայտարարել այդ մասին, ինչպե՞ս է դա հնարավոր:

Կարծում եմ հնարավոր է, որովհետև միջուկային զենքը դրոշակ չէ, որ ծածանես: Միջուկային զենքը դա աշխարհաքաղաքական ստատուս-քվո է: Թեհրանը փաստացի առաջարկում է Արևմուտքին պայմանավորվել Մերձավոր Արևելքում գոյություն ունեցող ստատուս-քվոյի շուրջ, դրա դիմաց հրաժարվելով դիրքավորվել որպես միջուկային պետություն և չշարունակել ծավալալ այդ տեխնոլոգիան: Որովհետև, եթե Իրանը հայտարարի միջուկային զենք ունենալու մասին, առնվազն երկու պետություն դրանից հետո հստակ բարձրաձայնելու են միջուկային զենք ունենալու իրենց իրավունքի մասին՝ Թուրքիա եւ Սաուդյան Արաբիա: Իսկ սա արդեն Արևմուտքի համար լինելու է նոր խնդիր ու գլխացավանք»: