«Մեր լաբորատորիաները խայտառակ վիճակում են»․ Գառնիկ Դանիելյան

ԱԺ տարածքային կառավարման, տեղական ինքնակառավարման, գյուղատնտեսության և շրջակա միջավայրի պահպանության հարցերի մշտական հանձնաժողովի նիստի ժամանակ «Հայաստան» խմբակցության պատգամավոր Գառնիկ Դանիելյանը մտահոգություն հայտնեց, որ խնդիրներ կան լաբորատորիաների հետ կապված՝ սկսած անասնաբուժականից։ «Մեր լաբորատորիաները խայտառակ վիճակում են։ Լաբորատոր փորձանմուշների բացակայության արդյունքում չեն կարողանում ախտորոշել հիվանդությունը։ Մարդիկ աշխատավարձ են ստանում պետական բյուջեից, պիտի բարի լինեն իրենց գործառույթը կատարեն։ Հիմա մարդկանց մենակ ենք թողել, ասում ենք՝ գնացեք մենակ որոշեք՝ ինչ հիվանդություն ա, ինչ ա։ Գյուղացին մենակ ո՞նց կարող ա էդ հարցերի պատասխանները ստանա։ Ունենք խնդիր նաև կոնյակի հետ կապված։ Մեր կոնյակագործներն ինձ ահազանգել են, որ ՌԴ-ում խնդիրներ և խոչընդոտներ են առաջանում կոնյակի հետ կապված։ Նմուշներ են վերցրել, և կարծես թե խոչընդոտ են հանդիսանում մեր ապրանքի արտահանման հետ կապված»,- նշել է Դանիելյանը։