«Հանցավորության աճի փոխարեն քննարկվում է Քյարամյան-Աղազարյան սկանդալը»․ Հակոբ Բադալյան

Քաղաքական մեկնաբան Հակոբ Բադալյանի թելեգրամյան գրառումը․ «Խորհրդարանական հայտնի սկանդալի ստվերում մնաց բուն թեման՝ երկրում քրեածին վիճակն ու իրավապահների խիստ անարդյունավետ աշխատանքը:

Ավելին, հենց իրավապահներն իրենք խոստովանեցին խորհրդարանում, որ վերջին տարիներին արձանագրվել է հանցավորության էական աճ: Սա պետք է լիներ հանրային գլխավոր թեման, սա պետք է լիներ հասարակական-քաղաքական օրակարգի առանցքային հարցերից մեկը:

Դրա փոխարեն, մենք արդեն երկու-երեք օր քննարկում ենք Քյարամյան-Աղազարյան սկանդալը: Ըստ երևույթին, եթե որևէ մեկը սցենար մտածեր, թե ինչպես հանրային ուշադրությունը բուն օրակարգից տեղափոխեր հպանցիկ թեմայի, հազիվ թե կարողանար մտածել ավելի հաջող տարբերակ:

Իսկ Հայաստանում հանցավորությունը շարունակում է աճել, ստանալ տարատեսակ առավել ցինիկ ու հանդուգն դրսևորումներ, սկսած պարզապես խուլիգանությունից, քրեական բարքերից, գողությունից, մինչև թմրանյութերի վաճառք, որը իր «ազատությամբ» արդեն հասել և անցել է դպրոցների շեմը:

Ճանապարհային երթևեկության մասին թերևս խոսելն ավելորդ է: Այստեղ տեսախցիկների դիմաց նստած սպասում են, որպեսզի վարորդը մի գիծ տրորի, մի քանի վայրկյան ավել կանգնի չնախատեսված վայրում, որ անմիջապես վարչական ակտը դակեն և ուղարկեն տուն, իսկ ճանապարհներին լկտի ու դժոխային վարքագծին հետևող չկա:

Ավելորդ է ասել թերևս, որ չկա կառավարման համակարգ, որն ի վիճակի կլինի զբաղվել այդ հարցով: Հետևաբար, պետք է անել առավելագույնը՝ հասարակությանը տարատեսակ հպանցիկ տեսարաններով զբաղեցնելու համար: Ցավոք, չկան նաև հասարակական-քաղաքական ինստիտուտներ, որոնք թույլ չեն տա հասարակությանը զբաղեցնել տեսարաններով և կպարտադրեն իրապես հանրային եւ պետական կարեւորության օրակարգեր, պահանջելով դրանց համար պատասխանատվություն»: