«Ադրբեջանի պաշտպանական ծախսերն ավելացել են 1,7 միլիարդ մանաթով»․ Հակոբ Բադալյան

Քաղաքական մեկնաբան Հակոբ Բադալյանի ֆեյսբուքյան գրառումը․ «Ադրբեջանի 2025 թվականի պետական բյուջեի նախագծում պաշտպանական ծախսերը ոչ միայն չէին ավելացված, այլ նաև նվազել էին մոտ 6 տոկոս՝ 2024-ի համեմատ: Բայց, Իլհամ Ալիևի հանձնարարությամբ դրանք ավելացել են 1,7 միլիարդ մանաթով և Ադրբեջանը նախատեսում է ծախսել մոտ 5 միլիարդ դոլար:

Ընդ որում, ամենից զավեշտալին այն է, որ Ալիևը այդ հանձնարարությունը բացատրել է Հայաստանի աճող ռազմականացմամբ: Հասկանալի է, որ Հայաստանի սպառազինության ձեռքբերումն ու պաշտպանական ծախսերը մեղմ ասած չունեն այն տեմպը, որը կարող է առանձնապես մտահոգել Բաքվին, բայց Ադրբեջանի համար խնդիրն իհարկե դա չէ, դա առիթն է, իսկ բուն հարցը այն է, որ Ալիևը շարունակում է հետապնդել իր գլխավոր հավակնությունը՝ դառնալ Կովկասի գերակա պետություն:

Կհաջողվի նրան դա, թե ոչ, սա հարցի մյուս կողմն է: Ավելին, Ադրբեջանի այդ հավակնոտ նպատակը կարող է թելադրված լինել իհարկե նաև ավելի մեծ մտավախություններով: Մասնավորապես, Ալիևը թերևս համարում է, որ աշխարհաքաղաքական վերաձևումների այս մեծ գործընթացի կամ փաստացի համաշխարհային պատերազմի պայմաններում գոյություն ունեցող ռիսկերի հանդեպ պետք է վարել ագրեսիվ քաղաքականություն, ըստ այդմ դնել հավակնոտ նպատակներ, առնվազն սեփական խաղադրույքները բարձրացնելու և նվազագույնի հասնելու համար: Հակված եմ մտածել, որ նա ըստ էության չի ուզում պատերազմ: Ոչ թե խաղաղասեր լինելու պատճառով, այլ չի ուզում, որովհետև իր համար շատ ավելի շահեկան է «նախապատերազմական» ռեժիմը՝ քաղաքական մանևրի համար, քան պատերազմը, որը կարող է պարունակել անկանխատեսելիություն և դուրս լինել իր կառավարման տիրույթից: Բայց, նա պատրաստվում է պատերազմի, շատ լավ պատկերացնելով, որ այդ որոշումը կայացվելու է իրենից դուրս, և, եթե կայացվեց ու հասունացվեց աշխարհաքաղաքական տիրույթում, ինքը ստիպված է լինելու հաշվի նստել այդ որոշմանը, ավելին՝ ինքն է լինելու այդ որոշման կատարածուն»: