«Վերջին շրջանում նոր տեսակի կոռուպցիա է զարգանում»․ Տիգրան Ավինյան

«Վերջին շրջանում նոր տեսակի կոռուպցիա է զարգանում բրոկերական ընկերությունների կողմից»,-գործակարգավարական խորհրդակցության ժամանակ հայտարարեց քաղաքապետ Տիգրան Ավինյանը՝ նշելով, որ այդ ընկերություններն առաջարկում են կազմակերպել շինթույլտվությունների հետ կապված գործերը՝ փաստացի խաբելով կառուցապատողներին․ «Ասում են՝ կարող ենք կազմակերպել՝ 90% հավանականությամբ, բայց կա 10% հավանականություն, որ գործը չի ստացվի։ Եթե Երևանի քաղաքապետարանը իր ստանդարտ պրոցեսով տալիս է շինթույլտվության դրական եզրակացություն, ապա ստացվում է, որ խնդիրը լուծել են, եթե չի տալիս, ասում են՝ դե չստացվեց, էն 10%-ն աշխատեց»,- մանրամասնեց Ավինյանը՝ խոսքն ուղղելով կառուցապատողներին․ «Մի եղեք միամիտ, Երևանի քաղաքապետարանում նմանատիպ որոշումներ կայացնելու պրոցեսը բավականին դիվերսիֆիկացված է և փաստացի քաղաքաշինական ծրագրերի վերաբերյալ կարծիք են տալիս իրարից անկախ ճարտարապետներ, և ճարտարապետական խորհրդի կարծքի վրա են միայն տրվում ճարտարապետահատակագծային առաջադրանքներ և շինթույլտվություններ։ Հետևապես բրոկերական ծառայություններից խորհուրդ չեմ տալիս օգտվել, որովհետև դրանք փաստացի ապօրինի գործունեություն ծավալող ընկերություններ են: Նրանց հույսը ձեր միամտությունն է»,-ասաց Ավինյանը։