«Ինչ է լինելու նոյեմբերի 5-ից հետո․ այստեղ է գլխավոր հարցը»․ Հակոբ Բադալյան

Քաղաքական մեկնաբան Հակոբ Բադալյանի թելեգրամյան գրառումը․ «Հետևելով իհարկե Վրաստանի խորհրդարանի ընտրությանը, ուշադրություն բաց չթողնենք իրան-իսրայելական կամ մերձավորարևելյան տիրույթը: Այստեղ, ինչպես արդեն հայտնի է, Իսրայելը «պատասխանել» է Իրանին: Եվ կարծես թե այս փուլում դրանով ավարտվել է թեժը: Իրանը հայտարարել է պատասխանի իրավունքի մասին, բայց իսրայելական հարվածը այնպիսին չէ, որ Իրանին «պարտավորեցնի» ընդգծված հարվածի հարցում:

Դետալների մեջ ներկայումս չխորանալով, կարծում եմ, որ Վաշինգթոնին հաջողվեց թույլ չտալ այնպիսի էսկալացիա, որը մինչև նոյեմբերի 5-ը կբերեր ռեգիոնալ մեծ պայթյունի, դրա հետևանքով էլ դեմոկրատների նախընտրական «արժեթղթերի» փլուզման:

Բայց, ինչ է լինելու նոյեմբերի 5-ից հետո, երբ պարզ կլինի ԱՄՆ նախագահի ընտրության արդյունքը: Այստեղ է գլխավոր հարցը: Եվ այստեղ իհարկե հնարավոր է դիտարկել շատ սցենարներ: Առաջիկայում կփորձեմ անդրադառնալ այդ թեմային առանձին սցենարային գնահատականով:

Առայժմ հայտնեմ տեսակետս խնդրի ավելի ընդգրկուն իմաստով, ինչի մասին նաև օրեր առաջ խոսել եմ հարցազրույցի ընթացքում:

Աշխարհը փոխվում է, փոխվում են ռեգիոնները, ռեգիոնալ միջավայրերը, անվտանգության կառուցվածքը առանձին ռեգիոններում և աշխարհում ընդհանրապես: Ի հայտ է եկել ուժերի նոր բալանս, այդ թվում Մերձավոր Արևելքում: Նոր իրողությունները ենթադրում են նոր հարաբերություն: Եվ այստեղ առանցքային նշանակության հարց է դառնում ամերիկա-իսրայելական հարաբերությունը:

Իմ սուբյեկտիվ գնահատմամբ, եթե այսպես ասած հին համակարգում ամերիկա-իսրայելական հարաբերությունն էր միջավայր կանխորոշող, ապա այսօր արդեն, և վաղն առավել ևս, նոր միջավայրն է կանխորոշելու ամերիկա-իսրայելական հարաբերություն: Ըստ իս, ԱՄՆ պատկերացնում է դա և համարում, որ հինը պահելը, հնով շարունակելը փակուղի է:

Իսրայելը փորձում է դիմադրել, լավ պատկերացնելով իհարկե, որ դիմադրությունն էլ փակուղի է: Բայց Թել Ավիվը կարծես թե չունի իրեն գոհացնող որևէ այլ զարգացման տարբերակ»։