«Հայաստանի պետական պարտքն օրական աճում է շուրջ 2,5 միլիարդով»․ Գառնիկ Դանիելյան

«Հայաստանի պետական պարտքն օրական աճում է շուրջ 2,5 միլիարդով: Յուրաքանչյուր քաղաքացու հաշվարկով դա շուրջ 5 հազար դոլար է»,- այս մասին այսօր ԱԺ-ում հայտարարությունների ժամին նշեց «Հայաստան» խմբակցության պատգամավոր Գառնիկ Դանիելյանը:

Պատգամավորի դիտարկմամբ՝ այս ամբողջ իրականության մեջ բյուջեի հսկայածավալ վատնումներ են տեղի ունենում: «Օրինակ՝ տարբեր համերգների, Սնուփ Դոգի ականջը կանչի, 6 մլն դոլար մենակ գնացել է նրա վրա, որ այդ գումարը տվել են ու հիմա չգիտեն՝ երբ կլինի, ինչ կլինի: Տիեզերք արբանյակ են ուղարկում՝ 8 մլն դոլար: Հիմա էլ հպարտ հայտարարում են, որ էդ 8 մլն-ը, որ ծախսել են, տրինաժոր է, որից պետք է մի քանի լուսանկար ստանան: Էլ չեմ ասում, որ հսկայական գումարներ են գնում հեծանվային արշավների վրա, չեմ խոսում համերգների, ֆեստիվառների մասին: Եվ այս ամեն ինչը մեր քաղաքացիների հաշվին:

Հիմա էլ որոշել են հունվարի 1-ից թանկացնել տրանսպորտը, ու դա ցույց են տալիս, թե ինչ մեծ հաջողություն է տեղի ունեցել․․․ Խոսքը տրանսպորտի եռակի թանկացման մասին է․․․ Բայց սա չի վերաբերում իշխանություններին, որոնք ինչպես շարունակել են իրենց թանկարժեք կյանքը, ճանապարհորդությունները, հիմա էլ շարունակում են․․․ Ի՞նչ է սա, եթե ոչ թալան ու անարգանք սեփական քաղաքացիների նկատմամբ»,- հայտարարեց պատգամավորը: