Նեթանյահուն պատանդների համար առատ փրկագին է խոստացել

Իսրայելը պատրաստ է պաղեստինցիներին վճարել 5 միլիոն դոլար յուրաքանչյուր պատանդի համար, ում կհաջողվի ազատվել ՀԱՄԱՍ-ի գերությունից։ Այս մասին նոյեմբերի 19-ին Գազայի հատված կատարած այցի ժամանակ հայտարարել է Իսրայելի վարչապետ Բենիամին Նեթանյահուն։

«Նրանց, ովքեր ուզում են դուրս գալ այս վիճակից, ասում եմ՝ ով մեզ գերի կբերի, մենք նրան անվտանգ ելք կապահովենք։ Ե՛վ նրան, և՛ նրա ընտանիքին»,- դիմելով պաղեստինցիներին՝ ասել է հրեական պետության ղեկավարը և նշել վարձատրության չափը։

«Ընտրությունը ձերն է. ամեն դեպքում, արդյունքը նույնն է լինելու՝ մենք բոլորին կվերադարձնենք»,- հավելել է Նեթանյահուն։