«Ապշեցնող հայտարարությունների եմ հանդիպում»․ Թաթուլ Հակոբյան

Լրագրող Թաթուլ Հակոբյանի ֆեյսբուքյան գրառումը․ «Հետևելով մեր դիվանագետների, այդ թվում առնվազն վեց-յոթ նախկին արտգործնախարարների և փոխարտգործնախարարների տեքստերին, եկել եմ այն կարծիքին, որ ընդհանուր առմամբ, շփոթ կա դիվանագիտության, հայրենասիրության, պատմության, քարոզչության ու լոբբինգի միջև:
Ապշեցնող հայտարարությունների ու մեկնաբանությունների եմ հանդիպում: Ինչպես կարելի է հնարավորն ու ցանկալին իրար խառնել: Ինչ կապ ունի լոբբինգը դիվանագիտության հետ: Ինչպես կարելի է երազայինն ու անհրաժեշտը իրար խառնել:
Ընդհանուր օրինակներ բերեմ՝ չթիրախավորելով մարդկանց:
Այդ մարդիկ ժամանակին համոզված էին, որ ստատուս-քվոն լուծում է: Ավելին, այնքան հայրենասեր էին, որ 42 հազար քառակուսի կիլոմետրը քիչ էին համարում:
Երբ աղետալի պարտություն կրեցինք, նրանք հնարավոր էին համարում դեօկուպացիան, այդ թվում Շուշիի և Հադրութի վերադարձը բանակցային ճանապարհով:
Երբ եղավ 2023-ի սեպտեմբերյան արհավիրքն ու տեղահանությունը, նրանք պնդում են, որ հնարավոր է հավաքական վերադարձը:
Թող չստեղծվի տպավորություն, որ մենք մեր նախկին արտգործ և փոխարտգործնախարարներից պակաս ցանկություն ունենք՝ տեսնելու ավելի մեծ Հայաստան:
Մեր երիտասարդ դիվանագետներին պետք է հստակ սովորեցնել դիվանագիտության, հայրենասիրության, պատմության, քարոզչության ու լոբբինգի միջև տարբերությունը:
Հավանաբար պետք է թարմ ուղեղով և սառը իրապաշտությամբ մի ձեռնարկ կազմել դիվանագիտության մասին, որտեղ լինեն առատ մեջբերումներ Առաջին և Երրորդ հանրապետության հիմնադիրների ու ռեալպոլիտիկ գործիչների ելույթներից, հայտարարություններից ու տեքստերից»։