Բլինքենն ու Ֆիդանը քննարկել են Սիրիայում տիրող իրավիճակը

ԱՄՆ պետքարտուղար Էնթոնի Բլինքենը և Թուրքիայի արտգործնախարար Հաքան Ֆիդանը հեռախոսազրույց են ունեցել, նրանք քննարկել են իրավիճակը Սիրիայում, Գազայում, Ուկրաինայում և Հարավային Կովկասում։ ՏԱՍՍ-ին այս մասին հայտնել է Թուրքիայի ԱԳՆ աղբյուրը։

«Ֆիդանը հայտարարել է, որ Թուրքիան դեմ է իրադարձությունների ցանկացած զարգացմանը, որը կուժեղացնի անկայունությունը տարածաշրջանում, և այդ համատեքստում հանդես է գալիս լարվածության նվազեցման օգտին: Նա հայտարարել է, որ ռեժիմի և ընդդիմության միջև քաղաքական գործընթացը պետք է ավարտվի Սիրիայում խաղաղություն հաստատմամբ: Նա նաև նշել է, որ Թուրքիան երբեք թույլ չի տա ահաբեկչական գործողություններ իր և սիրիացի քաղաքացիական բնակչության դեմ»,- հայտնել է աղբյուրը։
Զրույցի ընթացքում քննարկվել են նաև Ուկրաինայի և Հարավային Կովկասի, ինչպես նաև Գազայի հատվածի հարցերը։ «Ֆիդանն ասել է, որ Իսրայելը պետք է կատարի իր խոստումները, որպեսզի հրադադարը Լիբանանում մշտական ​​լինի: Նա ասել է, որ Գազայում պետք է հնարավորինս շուտ հրադադար հաստատվի և տարածաշրջան հասցվի մարդասիրական օգնություն»,- ասվել է գերատեսչությունից։
Հիշեցնենք, նոյեմբերի 28-ին հաղորդվեց, որ սիրիական ընդդիմությունը հարձակում է ձեռնարկել Հալեպի ուղղությամբ։ «Հայաթ Թահրիր աշ-Շամ» խմբավորման զինյալներն ընդամենը մի քանի ժամում կարողացել են 32 գյուղ գրավել՝ ընդհուպ մոտենալով Հալեպից ընդամենը 20 կիլոմետր հյուսիս գտնվող Նուբբուլ քաղաքին։

Երկու օր անց հաղորդվեց, որ իսլամիստական զինված խմբավորումները մտել են կառավարական ուժերի վերահսկողության տակ գտնվող Հալեպ քաղաք և գրավել դրա մեծ մասը։

«Անկարան աջակցում է ոչ թե Ասադի ռեժիմին, այլ դրան ընդդիմացող խմբավորումներին, որոնց օգնությամբ անցած տարիներին ռազմական ներկայություն է հաստատել Սիրիայի հյուսիս-արևմուտքում։ Թուրքիայի արտգործնախարարը, սակայն, հերքել է Թուրքիայի ներգրավվածությունն ապստամբների գործողություններին՝ պնդելով, որ Անկարան երբեք թույլ չի տա, որ Սիրիայում «ահաբեկչական կառույցը վերածվի պետության»։ Ֆիդանը Միացյալ Նահանգներին է մեղադրել տարածաշրջանում նման խմբավորումներին աջակցելու համար՝ պնդելով, որ նրանք երեք օր անգամ չեն կարող շարունակել իրենց գործողություններն առանց Վաշինգտոնի աջակցության»,- գրում է «Ազատությունը»։