«Ընդդիմությունը վերջին 3 տարում ամեն ձև հնարավորություն է տվել, որ իր տեղը մեկ ուրիշը վերցնի»․ Վիկտոր Սողոմոնյան

2021 թվականից այս կողմ, որքան էլ դա կարող է տարօրինակ հնչել, քաղաքական դիսպոզիցիան չի փոխվել։ 5-րդ ալիքի եթերում այսպիսի տեսակետ է հայտնել քաղաքական գիտությունների դոկտոր, Մոսկվայի Միջազգային հարաբերությունների պետական ինստիտուտ-համալսարանի պրոֆեսոր Վիկտոր Սողոմոնյանը։ Նրա խոսքով՝ կա իշխանություն և ձևավորված խորհրդարանական ընդդիմություն, ուրիշ ձևավորված ընդդիմություն չկա։ «Իշխանություն, որ իր դիրքերը չի զիջել, և ընդդիմադիր դաշտ, որի լիդերությունը ևս չի փոխվել, այսինքն՝ նույն դիսպոզիցիան մնացել է։ Տարբերությունն ինչո՞ւմն է՝ իշխանությունը ցանկացած գնով պահում է իր իշխանությունը, ընդ որում դա արդեն ինքնանպատակ է՝ ո՛չ օրակարգ կա, ո՛չ ինչ-որ նոր բան անելու ծրագիր կա, ընդդիմությունը՝ հակառակը․ այս վերջին երեք տարում ամեն ձև հնարավորություն է տվել, որ իր տեղը մեկ ուրիշը՝ մեկ ուրիշ ընդդիմություն վերցնի»,- նկատել է Սողոմոնյանը։ Նա շեշտել է, որ ինչ շարժում եղել է, խորհրդարանական ընդդիմությունը գնացել՝ հետնաբեմում կանգնել է, փորձել է օգնել։