«ԵՄ-ն «Տիտանիկ» չէ, և Հայաստանը «Տիտանիկի» տոմս չի գնել»․ Արման Եղոյան

«Հանրաքվեն ժամանակավրեպ է, որովհետև ԵՄ անդամակցության հարցով հանրաքվեներ տեղի են ունենում ԵՄ անդամակցելուց ամիսներ առաջ, հիմա հնարավոր անդամակցությունից ամիսներ առաջը չէ, այլ տարիներ առաջն է»,- «Ա1+»-ի հետ հարցազրույցում այս կարծիքը հայտնեց ԱԺ Եվրոպական ինտեգրման հարցերի մշտական հանձնաժողովի նախագահ, «Քաղաքացիական պայմանագիր» խմբակցության պատգամավոր Արման Եղոյանը։
Անդրադառնալով դիտարկմանը, որ կառավարությունը դրական եզրակացություն է տվել «ԵՄ-ին ՀՀ անդամակցելու գործընթացի մեկնարկի մասին» օրենքի նախագծին, Արման Եղոյանը նշեց, որ ենթադրում է՝ գործադիրը գնաց այդ քայլին, քանի որ նոր եվրոհանձնաժողով է ձևավորվել՝ փոխվել են 3 կարևոր պաշտոնյաներ՝ Եվրոհանձնաժողովի ղեկավարը, բարձր հանձնակատարը՝ արտգործնախարարը, և Եվրոպական խորհրդի նախագահը, որոնք կարող են արտաքին քաղաքական դիրքորոշմամբ հանդես գալ, և ԵՄ-ից արդեն որոշակի ազդակներ են եղել։
«Բայց սա մեկնարկի սկիզբն է։ Մեր հաջորդ տրամաբանական քայլը, այս փուլից սկսած, պետք է լինի ազատ առևտրի համաձայնագրի շուրջ բանակցելը»,- նշեց Եղոյանը։
Նրա դիտարկմամբ՝ հայտարարել, որ ԵԱՏՄ-ից դուրս պետք է գալ, դա մեծ գյուտ չէ։ «Մեկ պետությունը չի կարող լինել երկու մաքսային պետության անդամ և երկուսի հետ էլ ունենալ ազատ առևտրի համաձայնագիր»,- նշեց պատգամավորը։
Ի պատասխան ՌԴ-ից հնչող այն տեսակետին, թե ԵՄ-ին անդամակցելը կնշանակի ՀՀ տնտեսության խորտակում, Եղոյանը նշեց․ «Ես չեմ կարծում, որ մենք թշնամական քայլ ենք կատարում Ռուսաստանի հանդեպ․․․ Եվ ես չեմ կարծում, թե ԵՄ-ն «Տիտանիկ» է։ Հայաստանը «Տիտանիկի» տոմս չի գնել, խոսքը տարբեր գործընկերների հետ հարաբերություններ կառուցելու մասին է, և այնպես չէ, որ ՌԴ-ի (ոչ թե ԵԱՏՄ-ի) հետ շփումներն էլ կզրոյացնենք»։