«Վիզաների ազատականացման հարցը տեղափոխվել է գործնական փուլ»․ Արփինե Սարգսյան

«ԵՄ-ի հետ վիզաների ազատականացման հարցը խոսակցությունների մակարդակից տեղափոխվել է գործնական փուլ, անցած տարի տրվեց այդ գործընթացի պաշտոնական և գործնական փուլի մեկնարկը»,- այս մասին տարեկան ամփոփիչ ասուլիսի ժամանակ տեղեկացրեց ՆԳ նախարար Արփինե Սարգսյանը։

Նախարարի խոսքով՝ գործընկերների հետ աշխատանքը շարունակվում է, առաջիկա ամիսներին առաքելություններ պետք է այցելեն Հայաստան։

«Ակնկալվում է, որ գարնանը եվրոպական կողմը մեզ կփոխանցի ԵՄ - Հայաստան գործողությունների ծրագիրը, որը չբանակցվող փաստաթուղթ է»,- նշեց նախարարը՝ հավելելով, որ այդ փաստաթուղթը ներառում է բազմաթիվ ոլորտներ՝ միգրացիա, ապաստանների տրամադրում, կենսաչափական անձնագրերի ներդրում, մարդու իրավունքների պաշտպանություն և այլն։

«ԵՄ-ի գործընկերները կառաջարկեն բաղադրիչներ, և ՀՀ-ի կողմից բավարարելու դեպքում խոսակցությունն ավելի դրական լույսի ներքո կընթանա»,- ասաց Սարգսյանը։

Ե՞րբ կարելի է ակնկալել վիզային ռեժիմի ազատականացում․ այս հարցին ի պատասխան՝ նախարարը նշեց․ «Սա գործողությունների ծրագրից բխող պրոցես է, և որևէ մեկը չի կարող կոնկրետ ժամկետներ հնչեցնել: Բայց կա կառավարության կամքը և վճռականությունը՝ հնարավորինս սեղմ ժամկետներում և թիրախային իրականացնելու ծրագրի բոլոր բաղադրիչները, մի շարք միջոցառումներ արդեն իսկ իրականացված են»։