«Աշխարհի ո՞ր կարգով են զոհին դատում». Հովհաննես Ավետիսյան

Հանրային կառավարման մասնագետ Հովհաննես Ավետիսյանի ֆեյսբուքյան գրառումը. «Երեկվանից գլխիցս սա դուրս չի գալիս: Հայերին իրենց հայրենիքից տեղահանել են, ջարդել են, գերեվարել են (ցեղասպանել են), և այս ամենից հետո էլ մի քանիսին, ի ստորացումն մեզ, ցուցադրաբար «դատում» են:
Ու փոխանակ նույն Ռուբենը՝ մնացյալ գերիների հետ, Հայաստանի ու Սփյուռքի հայերը պահանջեն միջազգային հանրույթի ներգրավվածությունը (եթե իհարկե մտածում են, որ լոկ պահանջով հարց է լուծվելու) գերիների ազատ արձակման համար, պահանջում են «արդար դատավարություն»:
Լո՞ւրջ: Ես չեմ հասկանում այս ամենը։ Ինձ ծեծեն, ջարդեն, տնազրկեն, ունեզրկեն, արյունակցիս սպանեն, հետո էլ ի՞նձ դատեն... Ու ես պահանջեմ, որ արդար դատե՞ն:
Ինչի՞ համար դատեն: Ո՞ւմ դատեն՝ զոհի՞ն: Ո՞վ է հանցագործը, ո՞վ՝ զոհը: Չե՞նք հասկանում, որ եթե պահանջում ենք, որ արդար դատեն, կնշանակի ընդունում ենք, որ դատելու արժանի արարք է արվել:
Այս խենթանոցը ինչ բացատրություն ունի: Աշխարհի ո՞ր կարգով են զոհին դատում, որ զոհն էլ արդար դատ ուզի:
Այս ի՞նչ օրի ենք հասել, ստորացում ու խայտառակություն ասել այս ամենին, կնշանակի բան չասել»: