«Համագործակցությունը  և տրանսպորտային նախագծերն ի զորու են խթանել խաղաղությունը և կայունությունը». Դավիթ Կարապետյան

Հունվարի 28-ին ՀՀ ԱԳՆ գլխավոր քարտուղար Դավիթ Կարապետյանը մասնակցել է «Ռաիսինա՝ Մերձավոր Արևելք» համաժողովի շրջանակներում կայացած «Hinterland to High Streets: Connectivity, Commerce and Communities» խորագրով քննարկմանը։ Այս մասին հայտնել են ԱԳՆ-ից:

ՀՀ ԱԳՆ գլխավոր քարտուղարն իր խոսքում անդրադարձել է առևտրի և տրանսպորտի վրա տարածաշրջանային ճգնաժամերի ազդեցության հաղթահարման կարևորությանը՝ մատնանշելով հակամարտությունների բացասական ազդեցությունը տարածաշրջանների ենթակառուցվածքների և տնտեսությունների վրա:

«Անվտանգ տրանսպորտային ուղիների ապահովումը և ենթակառուցվածքներում ներդրումների խթանումը առանցքային դեր են խաղում տարածաշրջանային խաղաղության և կայունության համատեքստում։

Հայաստանը, տասնամյակներ շարունակ առերեսվելով և դիմակայելով աշխարհաքաղաքական և անվտանգային մարտահրավերներին, հաստատուն է իր դիրքորոշման մեջ, որ տարածաշրջանային համագործակցությունը և տրանսպորտային նախագծերն ի զորու են հաղթահարել քաղաքական տարաձայնությունները և խթանել խաղաղությունը, կայունությունը և աճը»,- ընդգծել է Դավիթ Կարապետյանը։