«Ովքեր գուժում էին հայ-իրանական հարաբերությունների կործանումը, վերջապես կփորձեն ընկալել իրականությունը»․ Արման Բաբաջանյան

ԱԺ նախկին պատգամավոր Արման Բաբաջանյանի ֆեյսբուքյան գրառումը․ «Հայաստանում Իրանի դեսպան Մեհդի Սոբհանին, պատասխանելով հայ-ամերիկյան ռազմավարական գործընկերության համաձայնագրի վերաբերյալ լրագրողների հարցին, նշել է, որ ստորագրված փաստաթուղթը որևէ կերպ չի հակասում հայ-իրանական հարաբերություններին։ Նրա խոսքով՝ Երևանը հավաստիացրել է, որ այդ համաձայնագիրը որևէ վտանգ չի ներկայացնում Իրանի շահերի համար և չի ներառում որևէ քայլ, որը կարող է վնաս հասցնել հայ-իրանական հարաբերություններին։
Դեսպան Սոբհանին ընդգծել է, որ Իրանը ստորագրված փաստաթուղթը չի դիտարկում որպես իր դեմ ուղղված քայլ կամ որպես վտանգ հայ-իրանական համագործակցության համար։ Ավելին, եթե հայ-ամերիկյան ռազմավարական գործընկերության հանձնաժողովների աշխատանքը զարգանա նախանշված արդյունավետությամբ, դա կարող է նպաստել Հայաստանի հզորացմանը, դիմադրունակության և կենսունակության բարձրացմանը։
Նշենք, որ դեռևս ամիսներ առաջ, լրագրողների հետ մեկ այլ հանդիպման ընթացքում, դեսպան Սոբհանին հայտարարել էր, որ Իրանը աջակցում է Հայաստանի հզորացմանը նպաստող ցանկացած գործոնի, քանի որ ուժեղ Հայաստանը համապատասխանում է նաև Իրանի շահերին։
Այս համատեքստում հուսով ենք, որ նրանք, ովքեր հայ-ամերիկյան ռազմավարական գործընկերության մասին լսելով՝ շտապում էին մարգարեական ոռնոցներով գուժել հայ-իրանական հարաբերությունների կործանումն ու ապոկալիպսիսը, վերջապես կփորձեն ընկալել իրականությունը և ներողություն կխնդրեն»: