«Թուրքերի հետ էլ կարելի է լինել բարիդրացիական»․ Միքայել արքեպիսկոպոս Աջապահյան

Շիրակի թեմի առաջնորդ Միքայել արքեպիսկոպոս Աջապահյանը «Երևան տրիբուն»-ի եթերում խոսելով մահմեդականների նկատմամբ հանդուրժողականության մասին, նշեց, որ իսլամական երկրներում հայ եկեղեցիները սքանչելի հարաբերություններ ունեն իսլամիստ հարևանների և իշխանությունների հետ։

«Թուրքական գործոնը չպետք է իսլամական գործոն համարել, մեզ ցեղասպանության չի ենթարկել իսլամական հավաքականությունը․․․ Ցեղսպանությունը երբեք պետք չէ կապել իսլամի հետ։ Հայ եկեղեցին միշտ ունեցել է այդ իմաստնությունը՝ հասկանալու, որ Ցեղասպանությունը կապ չունի իսլամի հետ, թեև դա կրոնական ենթատեքստ ունեցել է՝ կրոնական պահանջ է եղել՝ իսլամացի՛ր, կփրկվես, բայց երբեք հայ եկեղեցին չի ընդունել որպես կրոնական ցեղասպանություն, դա եղել է էթնիկ ցեղասպանություն, դա թուրքական գործոն է ոչ թե իսլամական․․․ Իսլամիստ ժողովուրդները մեղավոր չեն թուրքի գործած ոճիրի համար։ Հետևաբար, այո, իսլամ ժողովուրդների հետ պետք է լինել բարիդրացիական։

Վաղը, մյուս օրը, եթե Թուրքիան վերանայի իր ընթացքը, թուրքերի հետ էլ կարելի է լինել բարիդրացիական։ Էդ ո՞վ է ասում, որ մենք հավերժ թշնամի ենք, հավերժ թշնամի կարգավիճակում լինեինք, հայ եկեղեցիները կփակեին Թուրքիայում»,- ընդգծեց Աջապահյանը։