«ԱՄՆ-ի Պետդեպի հրապարակած փաստաթղթերը հերքեցին թեզը, թե Մեղրին տալու միտքը եղել է Քոչարյանինը». Վարդան Օսկանյան

ՀՀ նախկին արտգործնախարար Վարդան Օսկանյանը ֆեյսբուքյան իր էջի ուղիղ եթերում անդրադարձավ վերջերս ԱՄՆ Պետդեպի հրապարակած փաստաթղթերին և պնդեց, որ դրանք ջախջախել են այն կեղծ թեզը, որ Արցախի դիմաց Մեղրին տալու միտքը եղել է Քոչարյանինը, դա եղել է Հեյդար Ալիևի առաջարկը, որի անմիջական վկաներից մեկը եղել է ինքը:

«Երբ Քոչարյանը Ժնևում ինձ ու Վազգեն Սարգսյանին ասաց, որ հայր Ալիևը նման առաջարկ է արել, մենք միանգամից ֆիքսեցինք, որ նա պատրաստ է հրաժարվել Արցախից: Մենք գիտեինք, որ Մեղրին տվող չկա, բայց մենք կարող ենք օգտվել Ալիևի՝ Արցախը զիջելու պատրաստակամությունից: Հենց դա էլ հաջողությամբ արեցինք 1.5 տարի բանակցելու արդյունքում Քիվեսթում, այնտեղ արձանագրվեց, որ Արցախը Լաչինով տրվում է Հայաստանին, իսկ Ադրբեջանը Արաքսի ափով՝ վերգետնյա էստակադայով կապ է ունենալու Նախիջևանի հետ: Քոչարյանը, Վազգեն Սարգսյանը և ես առնվազն պետք է լինեինք դիվանագիտական անմեղսունակներ, որ արհամարհեինք Ալիևի՝ Արցախը զիջելու ցանկությունը և աղբաման նետեինք թեկուզ և բանավոր նրա առաջարկությունը, ինչպես որ Փաշինյանը, դիվանագիտական անմեղսունակություն ցուցաբերելով, 2018 թվականին աղբաման նետեց Մինսկի խմբի համանախագահների առաջարկած Մադրիդյան փաստաթուղթը, որի առանցքային ձեռքբերումը հենց Արցախի ժողովրդի ինքնորոշման իրավունքն էր:

...Ժամանակն է՝ Մեղրիի թեման շահարկողներն առնվազն լռեն, քանի որ այդ թեման շահարկելով՝ Մեղրին կամ Սյունիքի մի հատվածը կորցնելու վտանգը առավել իրական է դառնում: Պետդեպի փաստաթղթերի առավել կիրառական հանգամանքն այն է, որ դրանք էապես ուժեղացնում են ՀՀ-ի բանակցային դիրքերը՝ Ադրբեջանին որևէ տարածք, միջանցք կամ նույնիսկ ճանապարհ տրամադրելու հարցում: Ադրբեջանը պատրաստ էր Արցախը փոխանակել Նախիջևանի հետ կապով, Փաշինյանը արդեն Արցախը հանձնել է Ադրբեջանին, և Ադրբեջանը արդեն բանակցային խաղաքարտ չունի միջանցք կամ նույնիսկ ճանապարհ պահանջելու: Խնդիրն այն է, որ դիվանագիտական կարողություններ չունեցող Հայաստանը միջազգային 0-ական գործոն դարձրած Փաշինյանը չկարողացավ նույնիսկ դա ձևակերպել և բանակցել: Հասկանո՞ւմ եք իրավիճակի աբսուրդը և վտանգը, մենք այսօր ունենք մի իշխանություն, որն արդեն տվել է Արցախը, կարող է տալ Սյունիքից մի հատված, կոպիտ ասած վերջում լինելու է և՛, և՛»,- ասաց նա: