«Անհրաժեշտ էր դիվանագիտական մոտեցում՝ Իսրայելի և ՀՀ-ի հարաբերությունները բարելավելու նպատակով»․ Տիգրան Խզմալյան

Եվրոպական կուսակցության ղեկավար Տիգրան Խզմալյանի ֆեյսբուքյան գրառումը․ «ՀՀ վարչապետ Փաշինյանը կոշտ ու փաստացի մերժողական պատասխան տվեց Իսրայելի վարչապետ Նեթանյահուի հայտարարությանը՝ Հայոց Ցեղասպանությունը ճանաչելու մասին։
Փաշինյանը կասկածի տակ դրեց ոչ միայն Նեթանյահուի հայտարարության ձևը՝ հարցազրույցի ընթացքում, այլ նաև դրա բովանդակությունը, հարցնելով, «արդյո՞ք Հայաստանին և հայ ժողովրդին պետք է Ցեղասպանության ճանաչումը ուրիշների քաղաքական շահի համար»։ Սա լուրջ քայլ է, քանի որ բացառում է Հայաստանի հնարավոր մերձեցումը աշխարհի ամենաազդեցիկ երկրներից մեկի հետ, որը ժամանակին առաջարկում էր ՀՀ իշխանություններին ռազմական աջակցություն ԱԹՍ-ների տեսքով, հետո նաև մարդասիրական օգնություն։ Երևանը մերժել էր այդ առաջարկները և արդյունքում Երուսաղեմը մերձեցավ Բաքվի հետ։ Այժմ Փաշինյանը «կենցաղային» մերժում է տալիս աշխարհաքաղաքական առաջարկին, բովանդակությունը նսեմացնելով ձևականի համեմատ և այսպիսով կրկին հանդես բերելով իր քաղաքական տհսասությունը ճակատագրական պահին։ ՀԵՎԿ-ը համարում է դա հերթական կոպիտ ու աններելի սխալ։ «Տղայական մուննաթի» փոխարեն, որը Փաշինյանը չի արտահայտում Ալիևի և Պուծինի հանդեպ, այս դեպքում անհրաժեշտ էր դիվանագիտական և իմաստուն մոտեցում՝ Իսրայելի և Հայաստանի ռազմավարական հարաբերությունները բարելավելու նպատակով։ Փաշինյանը կրկին փչացնում է այն ամենը, ինչին առնչվում է»։