«Չպետք է միայն բացասականը տեսնել օգոստոսի 8-ին ստորագրված փաստաթղթերի մեջ»․ Թաթուլ Հակոբյան

Լրագրող Թաթուլ Հակոբյանի ֆեյսբուքյան գրառումը․ «Հայաստանի բարձրաստիճան երեք պաշտոնյաներ հրապարակային և փակ հանդիպումներում, որոնցում ներկա եմ եղել, հիացմունքով են խոսել և երախտագիտություն հայտնել Միացյալ Նահանգների՝ Հայաստանի դեմ ադրբեջանական ագրեսիայի օրերին Բաքվին զսպելու հարցում ունեցած դերակատարության մասին:
Խոսքը, մասնավորապես, 2022 թվականի սեպտեմբերյան դեպքերի մասին է, երբ ադրբեջանական զինուժը ներխուժեց Հայաստանի սուվերեն տարածք և շարունակում է գրավման տակ պահել ավելի քան 200 քառակուսի կիլոմետ տարածք:
Նախկին պետքարտուղար Բլիքնենն անձամբ էր ներգրավված:
Այսօր Հայաստանի իշխանությունները քննադատության սլաքն ուղղել են ԱՄՆ նախկին նախագահ Բայդենի վարչակարգի պաշտոնյաների ուղղությամբ, քանի որ նրանցից մեկը համարձակվել է վերլուծել վաշինգտոնյան պայմանավորվածությունները և տեսակետ արտահայտել:
Նախկին փոխպետքարտուղար Ջեյմս Օ’Բրայենը իրավացիորեն նկատել է. պայմանավորվածությունների կարևորագույն տարրը Հայաստանի համաձայնությունն է՝ բացել իր տարածքի 43 կիլոմետրը Միացյալ Նահանգների կողմից կառավարվող միջանցքի համար, որը կապելու է Ադրբեջանը Նախիջևանին:
Այո՛, բարեկամներ, վաշինգտոնյան փաստաթղթերը ստորագրվել են հենց վերոնշյալ դրույթի համար, հակառակ դեպքում ո՛չ Ադրբեջանն էր ստորագրելու որևէ թուղթ Հայաստանի հետ, և ո՛չ էլ Թրամփն էր հետաքրքրություն ունենալու Սպիտակ տանը հյուրընկալել վարչապետ Նիկոլ Փաշինյանին և նախագահ Իլհամ Ալիևին:
Այդուհանդերձ, չպետք է արժեզրկել և միայն բացասականը տեսնել օգոստոսի 8-ին ստորագրված փաստաթղթերի մեջ: ՈՒ նրանք, ովքեր կուրորեն քննադատում են, պետք է նշեն այլընտրանքը, լուծումը...»։