«Ի՞նչ տեղի կունենար, եթե ԱԲ ունենայինք՝ ստեղծված Նիկոլի բանականության հիման վրա». Վիտալի Մանգասարյան

«Հենակետ» վերլուծական կենտրոնի ղեկավար Վիտալի Մանգասարյանի ֆեյսբուքյան գրառումը. «Ստախոս Արհեստական Բանականություն՝ Նիկոլ Փաշինյանի «մոդել»-ով:
Քանի որ այս օրերին Փաշինյանը գտնվում է Արհեստական բանականության գործողությունների գագաթնաժողովին, փորձենք հասկանալ, թե ի՞նչ տեղի կունենար, եթե, Աստված մի արասցե, արհեստական բանականություն ունենայինք՝ ստեղծված Նիկոլի բանականության հիման վրա։
Արհեստական բանականությունը (ԱԲ) այսօր դարձել է մեր կյանքի անբաժանելի մասը՝ օգնելով տեղեկատվության մշակումից մինչև որոշումների ընդունում։ Բայց ինչ կլիներ, եթե փորձեինք ստեղծել ԱԲ, որը ոչ միայն տրամաբանական եզրահանգումներ կաներ, այլև սիստեմատիկ կերպով կեղծ տեղեկատվություն տարածեր։ Փաշինյանի քաղաքական գործունեությունը կարող է ծառայել որպես հետաքրքիր օրինակ՝ հասկանալու, թե ինչ խնդիրների կբախվեինք նմանատիպ համակարգ ստեղծելու դեպքում։
Նիկոլի ղեկավարության տարիներին հասարակական դիսկուրսը բազմիցս հանդիպել է փաստերի աղավաղման, իրականության խեղաթյուրման և ակնհայտ ստերի, որոնք, անկախ բացահայտվելուց, շարունակվել են նոր ձևերով և արտաքին ոճոի փոփոխությամբ: Եթե պատկերացնենք, որ նրա քաղաքական հռետորաբանությունը դառնում է ԱԲ «մոդել»-ի հիմքը, ապա կունենանք մի համակարգ, որն ի վիճակի կլինի ինքն իրեն հակասելու:
Նման ԱԲ-ի առաջին հիմնական խնդիրը կլինի տեղեկատվության մշտական վերափոխումը՝ կախված իրավիճակից։ Փաշինյանի քաղաքական խոսքը հիմնականում ենթարկվում է կոնտեքստի փոփոխությունների. այն, ինչ ասվել է երեկ, այսօր կարող է հերքվել կամ փոխարինվել այլ տարբերակով՝ առանց որևէ տրամաբանական բացատրության։ ԱԲ-ն, որը կաշխատի այս տրամաբանությամբ, չի կարողանա տրամադրել տվյալներ, քանի որ նրա «ճշմարտությունը» անընդհատ կփոփոխվի։ Սա ոչ միայն կհանգեցնի խառնաշփոթի, այլև կդարձնի ԱԲ-ին ոչ պիտանի ցանկացած գործնական կիրառման համար։
Երկրորդ խնդիրը կլինի ստի ներմուծումը տվյալների բազայի մեջ։ Արհեստական բանականությունը սովորում է նախորդ տվյալներից, բայց եթե այս տվյալները կառուցված լինեն ստի վրա, ապա ԱԲ-ն չի կարողանա կատարելագործվել, քանի որ դրա ուսուցումը հիմնված կլինի հակասական և մանիպուլյատիվ տեղեկատվության վրա։
Փաշինյանի գործելաոճը ենթադրում է մեկ հայտարարության միաժամանակյա հակասում մեկ այլ հայտարարության, ինչը նշանակում է, որ ստախոս ԱԲ-ն կկանգնի ինքնաոչնչացման եզրին»: