«Մանիակալ, ցինիկ ատելություն ունի ՔՊ-ն արցախցիների նկատմամբ». Նարեկ Գալստյան

Լրագրող Նարեկ Գալստյանի ֆեյսբուքյան գրառումը. «Խորհրդարանի խոսնակ Ալեն Սիմոնյանի հայտարարությունը, թե «մնայիք ու կռվեիք», արտահայտում է այն մանիակալ ցինիկ ատելությունը, որ ՔՊ-ն ունի արցախցիների նկատմամբ և որը հետևողականորեն տարածում է իր վերահսկողության տակ գտնվող քարոզչամեքենաներով՝ այդ թվում և ՀՀ հպարտ հարկատուների հաշվին։
Պետք է, սակայն, անհոգնել հիշեցնել այն իրողությունները, որոնք հանգեցրել են հայ ժողովրդի պատմության ամենամեծ ողբերգություններից մեկին՝ Արցախի կորստին։
Եթե հիշում եք, Փաշինյանը, ստորագրելով նոյեմբերի 9-ի եռակողմ հայտարարությունը, իբրև իրեն արդարացում հայտարարեց, թե հակառակ պարագայում մեր 20-25 000 զորքը հայտնվելու էր շրջափակման մեջ, ուստի ստորագրել եմ, որ փրկեմ մեր տղաների կյանքերը։ Հիմա չխորանանք, թե ում և ինչ պատճառով մեր բանակը հասավ այն վիճակին, որ կարող էր հայտնվել շրջափակման մեջ, այս մասին ով աչք և ականջ ունի, վաղուց իր հետևություններն արել է։
Միով բանիվ ստացվում է՝ Փաշինյանը ստորագրեց, որ կյանքեր փրկի, իսկ մեկ տարի շրջափակման մեջ գտնվող, կիսասոված արցախցները, որոնք մի օրվա ընթացքում հայտնվել էին ադրբեջանական զորքերի շրջափակման մեջ, պետք է հարյուր հազարով մեռնեի՞ն։ Հասկանում եք, չէ՞, ՔՊ-ի համար ընդունելի կլիներ, որ այդքան մարդ մեռներ՝ կին, երեխա, ծեր, տղամարդ... Մեռնեին, որ այսօր Փաշինյանն ու յուր թիմը Հայաստանի թրքացման ճանապարհին ոչ մի խոչընդոտ չունենար։ Հետո մի հատ էլ կհարցներ, թե եկեք հասկանանք, էդ ո՞նց եղավ, որ «ԼՂ էթնիկ հայերին» կոտորեցին, էդ ի՞նչ էին արել, ո՞ւմ խոստումներին էին հավատացել։ Ցեղասպանության դեպքում կարող է ասել, այս դեպքում էլ կասեր, ի՞նչ է պատահել որ... Ու այսպես մորթված, արյունոտ ու կայենաբար կկառուցվեր ՆՓ-ի «Իրական Հայաստանը», որտեղ ոչ արցախցի կա, ոչ հիշողություն կա, ոչ արժեք կա, տո ոչ էլ հայ կա»: