«Անպատասխանատու և անպարտաճանաչ դատավորը». Էդգար Ղազարյան

Հասարակական-քաղաքական գործիչ Էդգար Ղազարյանի ֆեյսբուքյան գրառումը. «Անպատասխանատու և անպարտաճանաչ դատավորը
2025 թվականի հունվարի 20-ին ՀՀ Արարատի և Վայոց ձորի մարզերի առաջին ատյանի ընդհանուր իրավասության դատարանում, ՀՀ ԱԺ պատգամավոր (ՀՀ Վայոց ձորի տխրահռչակ նախկին մարզպետ) Տրդատ Սարգսյանի եղբոր՝ Դավիթ Սարգսյանի (ՀՀ Վայոց ձորի մարզպետի նախկին տեղակալ, ՀՀ սփյուռքի նախարարի նախկին տեղակալ) նախագահությամբ ավարտվել է ՀՀ Ազգային ժողովի նախագահ Ալեն Սիմոնյանի հայցն ընդդեմ Էդգար Ֆերդինանդի Ղազարյանի թիվ ԱՎԴ3/0080/02/23 քաղաքացիական գործով դատական վարույթը, որը մեկ անգամ վերսկսվել էր անհիմն պատճառներով։
Դատարանը հայտարարել էր, որ սույն գործով դատավճիռը պետք է հրապարակվեր DataLex դատական տեղեկատվական համակարգում 2025 թվականի փետրվարի 10-ին։ Փետրվարի 12-ի աշխատանքային օրվա ավարտի դրությամբ դեռևս դատարանն իր վճիռը չի հրապարակել՝ անհարգալից վերաբերմունք ցուցաբերելով ոչ միայն դատավորության մասնակիցների, այլև ինքն իր նկատմամբ՝ չհարգելով իր խոստումն ու ինքն իր առջև ստանձնած պարտավորությունը։
Հավանաբար, Հայցվոր կողմը (Ալեն Սիմոնյանը) վերջին օրերին շատ զբաղված է աղմկահարույց և թշնամահաճո հայտարարություններով և ժամանակ չի գտել վերջնական շտկումների համար։
Հ․Գ․ Դատարանների կողմից սահմանված ժամկետում վճիռներ չհրապարակելը, կարծես սովորական երևույթ է դատական համակարգում, ինչն արդեն Բարձրագույն դատական խորհրդի և ՀՀ արդարադատության նախարարության խնդիրն է»: