««Եվրոքվե»-ի ուժերը ՀՀ-ին տանում են ուկրաինացման ճանապարհով»․ Էդմոն Մարուքյան

«Շատ եվրոպացի քաղաքական գործիչներ արդեն չորեքշաբթի երեկոյան արձագանքել են ԱՄՆ նախագահ Դոնալդ Թրամփի հայտարարություններին Պուտինի հետ իր մոտալուտ հանդիպման մասին և Թրամփի ու ԱՄՆ պաշտպանության նախարար Փիթ Հեգսեթի հայտարարությանը, թե անիրատեսական է վերադարձնել Ուկրաինային կորցրած հողերը, հաղորդում է BBC-ն»,- գրում է ԼՀԿ ղեկավար Էդմոն Մարուքյանը՝ իր յութուբյան ալիքում հրապարակված տեսանյութին կից։ «Գրեթե բոլորն այն դիրքորոշմանն են, որ խաղաղ բանակցություններն անհնար են առանց Ուկրաինայի ու Եվրոպայի, և բանավոր զիջումները նույնիսկ բանակցությունների մեկնարկից առաջ նշանակում են դավաճանություն թե՛ Ուկրաինայի, թե՛ Արևմուտքի շահերին»,- գրում է Մարուքյանը՝ նշելով, որ ամբողջ աշխարհը Ուկարինային ասում էր՝ կռվիր, չընկրկես, արդյուքում խաբեցին, հույսեր տվեցին, տարան պատերազմի, կոտորեցին։
Էդմոն Մարուքյանի խոսքով «Եվրոքվե»-ի ուժերը, ԵՄ-ին անդամակցելու քողի տակ, ՀՀ-ին տանում են ուկրաինացման ճանապարհով․ «ԵՄ գնալը իրատեսական չէ, արդյունքում Թուրքիան և Ադրբեջանը հարձակվելու են մեր վրա, ՌԴ-ի հետ հարաբերությունների վատացման արդյուքում ատոմակայնը փակվելու, էներգետիկ համակարգը քանդվելու են․․․, իսկ ԱԺ ընդդիմությունը վախենում է խոսել, բոյկոտում է։ Ասում են քաղաքակիրթ աշխարհ պետք է գնանք, այդ աշխարհը այսօր Ուկրաինային ասում է բանակցի, մոռացի քո նախկին սահմանների մասին»,- ասում է Մարուքյանը՝ նշելով, որ Ուկրաինայում կատարվողից պետք է դասեր քաղենք։