«Տարածքներ՝ կարգավիճակի դիմաց բանաձևն ու հաղթողի կարգավիճակից հրաժարվելը լուրջ սխալներ էին»․ Վահրամ Մարտիրոսյան

Գործարար Վահրամ Մարտիրոսյանի ֆեյսբուքյան գրառումը. «Թրամփի և Պուտինի զրույցից հետո Թրամփը հայտարարեց թե Ուկրաինան ՆԱՏՕ չի մտնի և կհրաժարվի իր տարածքներից։ Միանգամից ամերիկյան քաղաքական հանրությունը այն որակեց որպես առնվազն բանակցային տրամաբանության լուրջ սխալ։
Ըստ փորձառու դիվանագետների ՆԱՏՕ-ի ու տարածքների հարցը պետք է լինի բանակցային թեմաների ցանկում, և դրանցից հրաժարվելու նախնական հայտարարություննները բանակցային տրամաբանության մեծ սխալ են։ Թրամփը, նախապես ընդունելով հակառակ կողմի դիրքորոշումը, փաստացի որպես բանակցությունների զրոյական կետ է սահմանում ՆԱՏՕ-ից և հողերից հրաժարված իրավիճակը։
Հիմա հետ գանք Հայաստան։ Արցախյան բանակցային գործնթացի ամենասկզբից ու բոլոր փուլերում հայկական կողմը բոլորից առաջ ընկնելով հայտարարում էր թե մենք պատրաստ ենք հողերը հանձնել։ Փաստացի դրանով բանակցությունների զրոյական կետ է սահմանվել հողերը հանձնած իրավիճակը։
Տարածքներ կարգավիճակի դիմաց բանաձևը թող էլի լիներ բանակցությունների սեղանին, բայց նախօրոք քո կոզրներից հրաժարվելու մասին հայտարարությունը բանակցային տրամաբանության լուրջ սխալ է։
Սա արցախյան բանակցություններում հայկական կողմի առաջին մեծ սխալն էր։ Բանակցային գործնթացում երկրորդ լուրջ սխալը հաղթանակած կողմի կարգավիճակից հրաժարումն էր։ Հայկական կողմն էր «ուժի և ուժի սպառնալիքի» կիրառման դեմ պայքարողը, հայկական կողմն էր դիտորդներ ու սահմանային դեպքերի հետաքննություններ մուրացողը։ Որոնք իմիջայլոց տասնամյակներով և հսկայական դիվանագիտական ռեսուրս ծախսելով այդպես էլ չստացավ։
Հիմա դրել տառակերություն են անում, թե միջնորդների առաջարկներում որ տառը ոնց է գրված եղել, բաց թողնելով բանակցային ռազմավարության բուն էությունը։
Մեր կողմը բանակցություններում ունեցել է շարունակական ռազմավարական նահանջներ երկու պատճառով՝ զրոյական կետի ընտրության մեջ զիջելով, և հաղթանակած կողմի կարգավիճակից հրաժարվելով։ Սրա համար պետք է պատասխան պահանջել նախկիններից, այլ ոչ թե իրերի հերթականությունը մի քիչ այնպես չդասավորելու համար»։